തിരുവനന്തപുരം: രാഷ്ട്രദീപിക തിരുവനന്തപുരം യൂണിറ്റ് റിപ്പോര്ട്ടര് എംജെ ശ്രീജിത്ത് (36) അന്തരിച്ചു. രോഗം ബാധിച്ച് ഏറെക്കാലമായി ചികിൽസയിലായിരുന്നു. വ്യാഴാഴ്ച ഉച്ചയോടെ വെള്ളനാട്ടുള്ള സഹോദരിയുടെ വസതിയിലായിരുന്നു അന്ത്യം. സംസ്കാരം ഇന്ന് രാത്രി എട്ടിന് മീനാങ്കലിലെ വീട്ടിൽ നടക്കും. മരണത്തിൽ മുഖ്യമന്ത്രി പിണറായി വിജയൻ അനുശോചിച്ചു.
ഒരു വ്യാഴവട്ടത്തിലേറെക്കാലം തലസ്ഥാനത്തെ വാര്ത്താ ലോകത്തെ കര്മോൽസുകനായ മാദ്ധ്യമ പ്രവര്ത്തകനായിരുന്നു ശ്രീജിത്ത്. അദ്ദേഹത്തിന്റെ നിരവധി രാഷ്ട്രീയ റിപ്പോര്ട്ടുകളും പോലീസ് സ്റ്റോറികളും ശ്രദ്ധ നേടിയിരുന്നു.
മീനാങ്കല് പാറമുക്ക് നിഷാ കോട്ടേജില് പരേതരായ മോഹനകുമാറിന്റെയും ജയകുമാരിയുടേയും മകനാണ്. ഭാര്യ: അഖില. ഏകമകള് ഋതിക. സഹോദരങ്ങള്: നിഷ, ശ്രുതി. ഏഷ്യാനെറ്റ് ന്യൂസ് ചീഫ് ക്യാമറാമാന് അയ്യപ്പന് ഭാര്യാപിതാവാണ്.
Also Read: തോല്വിയും ആഭ്യന്തര പ്രശ്നങ്ങളും; സംസ്ഥാന തലത്തില് പുനസംഘടനക്ക് ഒരുങ്ങി ബിജെപി