കുവൈത്ത് സിറ്റി: കോവിഡ് വ്യാപനത്തെ തുടർന്ന് നാട്ടിൽ കുടുങ്ങിയ വിദേശികളായ സർക്കാർ ജീവനക്കാരെ തിരിച്ചെത്തിക്കാനുള്ള നടപടികളുമായി കുവൈത്ത്. ഇതിനായി സാമൂഹ്യക്ഷേമ മന്ത്രിയുടെ നേതൃത്വത്തിലുള്ള കമ്മിറ്റിക്ക് കുവൈത്ത് സർക്കാർ നിർദ്ദേശം നൽകി. സാമൂഹ്യക്ഷേമ സാമ്പത്തികാസൂത്രണകാര്യ മന്ത്രി മറിയം അൽ അഖീലിന്റെ നേതൃത്വത്തിലുള്ള കമ്മിറ്റിക്കാണ് ചുമതല.
അടിയന്തിര സേവനം ആവശ്യമുള്ള വിദേശ ജീവനക്കാരെ രാജ്യത്തു തിരിച്ചെത്തിക്കാനാണ് നീക്കം. പ്രവേശന വിലക്കുള്ള രാജ്യങ്ങളിൽ ഉൾപ്പെടെ കുടുങ്ങിയ പ്രവാസി ജീവനക്കാരെ മുൻഗണനാടിസ്ഥാനത്തിൽ തിരികെ എത്തിക്കും. ഇതിനായി വിവിധ മന്ത്രാലയങ്ങളോടും വകുപ്പുകളോടും നാട്ടിൽ കുടുങ്ങിയ ജീവനക്കാരുടെ മുൻഗണനാടിസ്ഥാനത്തിലുള്ള പട്ടിക തയ്യാറാക്കാൻ നിർദ്ദേശം നൽകി. ആരോഗ്യമന്ത്രാലയത്തിലെ ഡോക്ടർമാർ ഉൾപ്പെടെയുള്ള ജീവനക്കാരെയായിരിക്കും ആദ്യം തിരികെ എത്തിക്കാൻ നടപടി സ്വീകരിക്കുക.