ചെന്നൈ: തമിഴ്നാട് സന്ദർശനത്തിന് എത്തിയ കേന്ദ്ര ആഭ്യന്തര മന്ത്രി അമിത് ഷാക്ക് നേരെ പ്ളക്കാർഡ് എറിഞ്ഞു. ചെന്നൈയില് പ്രവര്ത്തകരെ അഭിവാദ്യം ചെയ്യുന്നതിനിടെ ആയിരുന്നു സംഭവം.
ഉദ്യോഗസ്ഥർ തടഞ്ഞതിനാല് പ്ളക്കാർഡ് അമിത് ഷായുടെ ദേഹത്ത് വീണില്ല. പ്ളക്കാർഡ് എറിഞ്ഞ 67കാരനായ ദുരൈരാജ എന്നയാളെ പോലീസ് അറസ്റ്റ് ചെയ്തു.
രണ്ട് ദിവസത്തെ സന്ദർശനത്തിനായി ശനിയാഴ്ച ഉച്ചക്കാണ് അമിത് ഷാ ചെന്നൈയിൽ എത്തിയത്. മുഖ്യമന്ത്രി എടപ്പാടി പളനിസ്വാമി, ഉപമുഖ്യമന്ത്രി ഒ പനീർശെൽവം ഉൾപ്പടെയുള്ളവർ വിമാനത്താവളത്തിൽ എത്തി അമിത് ഷായെ സ്വീകരിച്ചു.
എംജിആർ, ജയലളിത എന്നിവരുടെ അനുസ്മരണ സമ്മേളനത്തിൽ പങ്കെടുക്കാനാണ് അമിത് ഷാ എത്തിയത്. ഇതിന് ശേഷം ബിജെപി കോർ കമ്മിറ്റി യോഗത്തിലും സർക്കാരിന്റെ മറ്റു പരിപാടികളിലും ഷാ പങ്കെടുക്കും.
Kerala News: ബിജെപി സംസ്ഥാന നേതാവിന് എതിരെ ആരോപണവുമായി യുവതിയും അമ്മയും
2021ൽ തമിഴ്നാട്ടിൽ നടക്കാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായാണ് അമിത് ഷായുടെ സന്ദര്ശനം. രാജ്യത്തിന്റെ പല ഭാഗങ്ങളിലും മുന്നേറ്റമുണ്ടാക്കിയപ്പോഴും തമിഴ്നാട്ടിൽ ബിജെപിക്ക് വേരുറപ്പിക്കാൻ സാധിച്ചിട്ടില്ല. ഖുശ്ബു ഉള്പ്പെടെയുള്ളവരെ ബിജെപി പാളയത്തിലെത്തിച്ച് അടുത്ത നിയമസഭാ തിരഞ്ഞെടുപ്പില് നേട്ടമുണ്ടാക്കാനാണ് ബിജെപിയുടെ നീക്കം. ഇതിന്റെ ഭാഗമായാണ് ‘വേൽയാത്ര’ പരിപാടി സംഘടിപ്പിച്ചതും. ഇപ്പോൾ അമിത് ഷാ നേരിട്ട് കളത്തിൽ ഇറങ്ങിയിരിക്കുകയാണ്.