മലപ്പുറം: പാലക്കാട് ജില്ലയിലെ മാത്തൂരിനെ മാതൃകയാക്കി മലപ്പുറം ജില്ലയിലെ ചെറുകാവ് പഞ്ചായത്തും. ചെറുകാവ് പഞ്ചായത്ത് ഓഫിസിലെ ജീവനക്കാരെയും ഭരണ സമിതി അംഗങ്ങളെയും സർ, മാഡം എന്ന് വിളിക്കുന്നത് ഒഴിവാക്കിയാണ് ചെറുകാവ് മാത്തൂർ പഞ്ചായത്തിലെ മാതൃക ഏറ്റെടുത്തത്. വിവിധ ആവശ്യങ്ങൾക്കായി പഞ്ചായത്ത് ഓഫിസിൽ എത്തുന്നവർ ഉദ്യോഗസ്ഥരെയോ ഭരണസമിതി അംഗങ്ങളെയോ സർ, മാഡം തുടങ്ങിയ വാക്കുകൾ ഉപയോഗിച്ച് അഭിസംബോധന ചെയ്യേണ്ടതില്ലെന്ന് ചെറുകാവ് ഭരണസമിതിയും തീരുമാനിച്ചു.
കൂടാതെ, പഞ്ചായത്തിലേക്കുള്ള അപേക്ഷകളിലും മറ്റ് കത്തിടപാടുകളിലും ഇത്തരം അഭിസംബോധനകൾ ഒഴിവാക്കണമെന്നും ഭരണ സമിതി അറിയിച്ചു. കത്തുകളിലും അപേക്ഷകളിലും ഉപയോഗിക്കുന്ന അപേക്ഷിക്കുന്നു, അഭ്യർഥിക്കുന്നു എന്നീ പദങ്ങൾക്ക് പകരം അവകാശപ്പെടുന്നു, താൽപര്യപ്പെടുന്നു തുടങ്ങിയ വാക്കുകളും ഉപയോഗിക്കണമെന്ന് ചെറുകാവ് ഭരണസമിതി അറിയിച്ചു.
ബ്രിട്ടീഷ് ഭരണകാലത്തെ പദപ്രയോഗങ്ങളാണ് ഇത്തരം അഭിസംബോധനകളെന്ന് ഭരണ സമിതി വിലയിരുത്തിയിരുന്നു. ഇതിന്റെ അടിസ്ഥാനത്തിലാണ് പുതിയ മാറ്റങ്ങൾ കൊണ്ടുവരാൻ അധികൃതർ തീരുമാനിച്ചത്. ഇത്തരം വിളികൾക്ക് പകരം ഔദ്യോഗിക സ്ഥാനങ്ങൾ തന്നെ അഭിസംബോധനയായി ഉപയോഗിക്കാമെന്ന് ചെറുകാവ് പഞ്ചായത്ത് പ്രസിഡണ്ട് പികെ അബ്ദുല്ല കോയ അറിയിച്ചു.
Read Also: കാറഡുക്കയിൽ കാട്ടാനശല്യം രൂക്ഷം; നാല് ഏക്കറോളം കൃഷിയിടങ്ങൾ നശിപ്പിച്ചു