ന്യൂയോര്‍ക്ക്: ആര്‍തര്‍ ആഷെ സ്റ്റേഡിയത്തില്‍ ശനിയാഴ്ച നടന്ന പോരാട്ടത്തിനൊടുവില്‍ 2020 യുഎസ് ഓപ്പണ്‍ വനിതാ കിരീടം ജപ്പാന്‍ താരം നവോമി ഒസാക്ക സ്വന്തമാക്കി. ബെലാറസ് താരം വിക്ടോറിയ അസരങ്കയെ ഫൈനലില്‍ പരാജയപ്പെടുത്തിയാണ് ഒസാക്ക രണ്ടാം യുഎസ് ഓപ്പണ്‍ കിരീടം നേടിയത്. ഒസാക്കയുടെ മൂന്നാമത്തെ ഗ്രാന്‍ഡ് സ്ലാം കിരീട നേട്ടമാണിത്.
ഒരു മണിക്കൂര്‍ 53 മിനിറ്റ് നീണ്ട മത്സരത്തിന്റെ ആദ്യ സെറ്റ് അസരങ്ക നിഷ്പ്രയാസം സ്വന്തമാക്കി. 6-1 നാണ് ഒസാക്കക്ക് ആദ്യ സെറ്റ് നഷ്‌ടമായത്. ഊര്‍ജമില്ലാത്ത റിട്ടേണുകളിലൂടെ മുന്നോട്ട് പോയ ഒസാക്കയുടെ ഏക പോയിന്റ് അസരങ്കയുടെ പിഴവ് മൂലമാണ് ലഭിച്ചത്. എന്നാല്‍, വളരെ പതിയെ ഗെയിമിലേക്ക് തിരിച്ചു വന്ന ഒസാക്ക രണ്ടാം സെറ്റിലാണ് മികച്ച പ്രകടനം കാഴ്‌ച വെച്ചത്. എയ്‌സുകളും കനത്ത റിട്ടേണുകളും ഒന്നിന് പുറകേ ഒന്നായി വന്ന ബ്രേക്ക് പോയിന്റുകളും കളിയുടെ ഗതി മാറ്റി. 12 ബ്രേക്ക് പോയിന്റുകളില്‍ 5 എണ്ണം ഒസാക്ക നേടി. അസരങ്കയുടേത് 5/10 ആയിരുന്നു. രണ്ടാം സെറ്റിലും ഫൈനലിലും ബ്രേക്ക് പോയിന്റുകളാണ് നിര്‍ണായകമായത്.
രണ്ടാം സെറ്റിലെ ഒസാക്കയുടെ പ്രകടനത്തിന് മുന്നില്‍ അസരങ്കെ പതറി. ആറ് എയ്സുകളാണ് ഒസാക്ക അസരങ്കക്ക് നേരെ തൊടുത്ത് വിട്ടത്. എങ്കിലും ഒസാക്കക്ക് എളുപ്പത്തില്‍ വിജയം നേടാമായിരുന്ന അവസാന രണ്ട് സെറ്റുകള്‍ ബ്രേക്ക് പോയിന്റിലൂടെ അസരങ്ക ഇല്ലാതാക്കി. അവസാനം 1-6, 6-3, 6-3 എന്ന സ്‌കോറില്‍ ഒസാക്ക വിജയം നേടി. 26 വര്‍ഷത്തിനിടെ യുഎസ് ഓപ്പണ്‍ വനിതാ ഫൈനല്‍ ചരിത്രത്തില്‍ ആദ്യമായാണ് ആദ്യ സെറ്റ് പരാജയപ്പെട്ട താരം കിരീടം നേടുന്നത്
