തിരുവനന്തപുരം: സംസ്ഥാനത്തെ മൂന്ന് സര്ക്കാര് ആശുപത്രികള്ക്ക് കൂടി നാഷണല് ക്വാളിറ്റി അഷ്വറസന്സ് സ്റ്റാന്റേര്ഡ് (എന്ക്യൂഎഎസ്) അംഗീകാരം ലഭിച്ചതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. തിരുവനന്തപുരം കാട്ടാക്കട ന്യൂ ആമച്ചല് കുടുംബാരോഗ്യ കേന്ദ്രം (സ്കോര് 96.4%), കൊല്ലം ഉളിയക്കോവില് അര്ബന് പ്രൈമറി ഹെല്ത്ത് സെന്റര് (സ്കോര് 93.5%), വയനാട് മുണ്ടേരി കൽപ്പറ്റ അര്ബന് പ്രൈമറി ഹെല്ത്ത് സെന്റര് (സ്കോര് 91.92%) എന്നീ കേന്ദ്രങ്ങള്ക്കാണ് പുതുതായി ദേശീയ ഗുണനിലവാര അംഗീകാരമായ എന്ക്യൂഎഎസ് ബഹുമതി ലഭിച്ചതെന്ന് മന്ത്രി വ്യക്തമാക്കി.
ഇതോടെ സംസ്ഥാനത്ത് എന്ക്യുഎഎസ് നേടുന്ന ആരോഗ്യ സ്ഥാപനങ്ങളുടെ എണ്ണം 124 ആയി. 3 ജില്ലാ ആശുപത്രികള്, 4 താലൂക്ക് ആശുപത്രികള്, 7 സാമൂഹികാരോഗ്യ കേന്ദ്രങ്ങള്, 32 അര്ബന് പ്രൈമറി ഹെല്ത്ത് സെന്റര്, 78 കുടുംബാരോഗ്യ കേന്ദ്രങ്ങള് എന്നിങ്ങനെയാണ് എന്ക്യുഎഎസ് അംഗീകാരം നേടിയിട്ടുള്ളത്.
രാജ്യത്തെ മികച്ച പ്രാഥമികാരോഗ്യ കേന്ദ്രങ്ങളുടെ വിഭാഗത്തില് ആദ്യത്തെ 12 സ്ഥാനവും ഇപ്പോഴും കേരളം നിലനിര്ത്തുകയാണ്. സര്വീസ് പ്രൊവിഷന്, പേഷ്യന്റ് റൈറ്റ്, ഇന്പുട്സ്, സപ്പോര്ട്ടീവ് സര്വീസസ്, ക്ളിനിക്കല് സര്വീസസ്, ഇന്ഫെക്ഷന് കണ്ട്രോള്, ക്വാളിറ്റി മാനേജ്മെന്റ്, ഔട്ട് കം, എന്നീ 8 വിഭാഗങ്ങളായി 6500 ഓളം ചെക്ക് പോയിന്റുകള് വിലയിരുത്തിയാണ് എന്ക്യുഎഎസ് അംഗീകാരം നല്കുന്നത്.
എന്ക്യുഎഎസ് അംഗീകാരത്തിന് മൂന്ന് വര്ഷ കാലാവധിയാണുളളത്. എന്ക്യുഎഎസ് അംഗീകാരം ലഭിക്കുന്ന പിഎച്ച്സികള്ക്ക് 2 ലക്ഷം രൂപ വീതവും മറ്റ് ആശുപത്രികള്ക്ക് ഒരു കിടക്കക്ക് 10,000 രൂപ എന്ന നിലയിലും വാര്ഷിക ഇൻസന്റീവ്സ് ലഭിക്കും. ആശുപത്രിയുടെ കൂടുതല് വികസനത്തിന് ഇത് സഹായകരമാണെന്നും മന്ത്രി കൂട്ടിച്ചേർത്തു.
Most Read: പിഎസ്സി ലാസ്റ്റ് ഗ്രേഡ് റാങ്ക് പട്ടിക നീട്ടി ഉത്തരവ്