തിരുവനന്തപുരം: ബിജെപി നേതാവും മുൻ എംഎൽഎയുമായ ഒ രാജഗോപാൽ കൈയ്യിൽ ദീപമേന്തിയ ചിത്രം ഫേസ്ബുക്കിൽ പോസ്റ്റ് ചെയ്തത് ‘സേവ് ബംഗാൾ’ ക്യാംപയിന്റെ ഭാഗമായാണെന്ന് വിശദീകരണം. ബംഗാളിൽ നടക്കുന്ന മനുഷ്യക്കുരുതികളിൽ പ്രതിഷേധിച്ച് തപസ്യ കലാസാഹിത്യ വേദി മെയ് 7 വെള്ളിയാഴ്ച സേവ് ബംഗാൾ ദിനമായി ആചരിക്കാനും വൈകുന്നേരം വീടുകളിൽ ദീപം തെളിയിക്കാനും ആഹ്വാനം ചെയ്തിരുന്നു. ബിജെപി ദേശീയ കമ്മിറ്റിയും ആർഎസ്എസ് ഉൾപ്പടെയുള്ള സംഘടനകളും ക്യാംപയിന് ഐക്യദാർഢ്യവുമായി രംഗത്തെത്തി.
തിരഞ്ഞെടുപ്പ് വിജയം ആഘോഷിക്കാൻ ഇടതുപക്ഷ പ്രവർത്തകർ വീടുകളിൽ ദീപം തെളിയിച്ചതും വെള്ളിയാഴ്ച വൈകിട്ടായിരുന്നു. ഇതേസമയം തന്നെയാണ് ഒ രാജഗോപാൽ വിളക്കേന്തിയ ചിത്രം പോസ്റ്റ് ചെയ്തത്. ഇത് സമൂഹ മാദ്ധ്യമങ്ങളിൽ ആശയക്കുഴപ്പത്തിന് ഇടയാക്കി. തുടർന്ന്, രാജഗോപാൽ പിണറായി വിജയന് ആശംസ അറിയിക്കാനാണ് ചിത്രം പോസ്റ്റ് ചെയ്തതെന്ന് അഭ്യൂഹങ്ങൾ പരന്നു.
എന്നാൽ, ബംഗാളിൽ ദുരിതം അനുഭവിക്കുന്നവർക്ക് ഐക്യദാർഢ്യം പ്രഖ്യാപിക്കണമെന്ന് ദേശീയ കമ്മിറ്റി നിർദ്ദേശിച്ചതിന്റെ അടിസ്ഥാനത്തിലായിരുന്നു പോസ്റ്റ് എന്നും പ്രചാരണങ്ങൾ ശുദ്ധ അസംബന്ധമാണെന്നും ഒ രാജഗോപാൽ വ്യക്തമാക്കി.
ടാഗോർ ജയന്തി ദിനം കൂടിയായിരുന്ന വെള്ളിയാഴ്ച രാവിലെ ഗീതാഞ്ജലി ആലപിച്ചായിരുന്നു തപസ്യ കലാസാഹിത്യ വേദിയുടെ നേതൃത്വത്തിൽ ബംഗാളിൽ ആക്രമിക്കപ്പെട്ടവരോട് ഐക്യദാർഢ്യം പ്രകടിപ്പിച്ചത്.
Also Read: ചൈനീസ് റോക്കറ്റിന്റെ പതനം ഏപ്രിൽ 10ന് മുൻപ്; ജനവാസ കേന്ദ്രത്തിൽ ആയിരിക്കില്ല