ന്യൂഡെൽഹി: കോവിഡ് മഹാമാരിയിൽ ബിജെപി നേതാക്കളും പ്രവർത്തകരും പ്രതിരോധ പ്രവർത്തനങ്ങളിൽ ഏർപ്പെടുമ്പോൾ പ്രതിപക്ഷ പാർട്ടികൾ ക്വാറന്റെയ്‌നിൽ പോയിരിക്കുകയാണെന്ന് ബിജെപി ദേശീയ അധ്യക്ഷൻ ജെപി നഡ്ഡ. നരേന്ദ്രമോദി സർക്കാരിന്റെ ഏഴാം വാർഷിക ദിനത്തിൽ പ്രവർത്തകരെ അഭിസംബോധന ചെയ്‌ത്‌ സംസാരിക്കുകയായിരുന്നു അദ്ദേഹം.
സർക്കാരിന്റെ ആത്‌മവീര്യം തകർക്കാനും ഭരണനിർവഹണത്തെ കുറിച്ച് എതിർപ്പ് ഉന്നയിക്കാനുമാണ് പ്രതിപക്ഷം ശ്രമിച്ചത്. ഇപ്പോൾ അവർ വാക്‌സിന് വേണ്ടി അലറിവിളിക്കുകയാണ്. നേരത്തെ വാക്‌സിനെ കുറിച്ച് സംശയം പ്രകടിപ്പിച്ചവർ ഇന്ന് അതിനായി പ്രതിഷേധിക്കുകയാണെന്നും നഡ്ഡ പറഞ്ഞു. പ്രതിപക്ഷ പാർട്ടികളെ ‘പ്രതിബന്ധം’ എന്നാണ് നഡ്ഡ വിശേഷിപ്പിച്ചത്.
പ്രതിപക്ഷം ഹോം ക്വാറന്റെയ്‌നിൽ പോയിരിക്കുകയാണ്. അവരെ ടിവിയിലും ചാനലുകളിലും ട്വിറ്ററിലും മാത്രമാണ് കാണാൻ സാധിക്കുന്നത്. മഹാമാരിയുടെ സമയത്ത് വിർച്വൽ വാർത്താ സമ്മേളനങ്ങളിൽ മാത്രം കാണാൻ കഴിഞ്ഞിരുന്ന പ്രതിപക്ഷ നേതാക്കളിൽ നിന്ന് വ്യത്യസ്‌തമായി ബിജെപി പ്രവർത്തകർ ജനങ്ങൾക്കൊപ്പം നിന്നെന്നും നഡ്ഡ കൂട്ടിച്ചേർത്തു.
Also Read: പ്രതിഷേധം ശക്‌തമാകുന്നു; ലക്ഷദ്വീപിൽ ഇന്റർനെറ്റ് വേഗത കുറയുന്നതായി പരാതി
