മലപ്പുറം: പാണ്ടിക്കാട് പോക്‌സോ കേസില്‍ ഒരാള്‍ കൂടി അറസ്‌റ്റില്‍. മേലാറ്റൂര്‍ എടയാറ്റൂര്‍ സ്വദേശി കുറ്റിക്കല്‍ ജിബിനാണ് അറസ്‌റ്റിലായത്. ഇതോടെ കേസില്‍ അറസ്‌റ്റിലായവരുടെ എണ്ണം 21 ആയി.
സംഭവത്തെ തുടര്‍ന്ന് ഒളിവിലായിരുന്ന ഇയാളെ വളാഞ്ചേരിയില്‍ വെച്ചാണ് പാണ്ടിക്കാട് പോലീസ് അറസ്‌റ്റ് ചെയ്യുന്നത്. പെരിന്തല്‍മണ്ണ കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്‌തു. പതിനേഴുകാരി പീഡനത്തിന് ഇരയായ കേസില്‍ നാല്‍പത്തിനാല് പേരാണ് പ്രതിപട്ടികയില്‍ ഉള്ളത്.
2016, 2017, 2020ലുമായി 32 കേസുകളാണ് സംഭവത്തിലുള്ളത്. ഇതില്‍ 29 കേസുകളും 2020ലാണ് നടന്നത്. പോക്‌സോ കേസില്‍ ഇരയായ കുട്ടികളെ നിരീക്ഷിച്ച് സുരക്ഷ ഒരുക്കുകയും തുടര്‍ കൗണ്‍സിലിംഗ് നല്‍കുകയും ചെയ്യണമെന്നാണ് നിയമം. എന്നാല്‍ കേസില്‍ ഇത് പാടെ അവഗണിക്കപ്പെട്ടു. പെണ്‍കുട്ടി തുടര്‍ച്ചയായി പീഡനത്തിന് ഇരയായി.
വര്‍ഷങ്ങള്‍ നീണ്ട പീഡന കഥ പുറത്തായതോടെ ചൈല്‍ഡ് പ്രൊട്ടക്ഷന്‍ ഓഫീസര്‍, ഷെല്‍ട്ടര്‍ ഹോമിലെ ഫീല്‍ഡ് വര്‍ക്കര്‍, പോലീസ് എന്നിവര്‍ക്ക് നേരെ ആരോപണങ്ങൾ ഉയര്‍ന്നിരുന്നു. പെരിന്തല്‍മണ്ണ ഡിവൈഎസ്‌പിയുടെ ചുമതലയുള്ള വിപിഷംസിന്റെ മേല്‍നോട്ടത്തില്‍ മൂന്ന് സിഐമാരും 7 എസ്ഐ മാരും ഉള്‍പ്പെടുന്ന പ്രത്യേക സംഘമാണ് കേസ് അന്വേഷിക്കുന്നത്.
Malabar News: കുതിരാന്‍ ടണല്‍ തുറക്കണം; ഹൈക്കോടതിയില്‍ ഹരജി
