ന്യൂഡെല്ഹി: സൗദി ഭരണാധികാരി സല്മാന് ബിന് അബ്ദുല് അസീസ് അല് സൗദ് രാജാവുമായി, പ്രധാനമന്ത്രി നരേന്ദ്രമോദി ടെലിഫോണില് സംസാരിച്ചു.
കോവിഡ് മഹാമാരി അന്താരാഷ്ട്ര തലത്തില് ഉയര്ത്തി കൊണ്ടിരിക്കുന്ന പ്രതിസന്ധികളെ കുറിച്ച് ഇരു നേതാക്കളും ചര്ച്ച നടത്തി. ജി20 കൂട്ടായ്മയില് സൗദി അറേബ്യ വഹിക്കുന്ന നേതൃത്വം കോവിഡിനെതിരായ പ്രതിരോധ പ്രവര്ത്തനങ്ങള് സ്വീകരിക്കുന്നതിന് ഏറെ സഹായകമായതായി നേതാക്കള് വിലയിരുത്തി. ജി20 തലത്തില് സ്വീകരിച്ച പ്രവര്ത്തനങ്ങള് മഹാമാരിയെ നേരിടുന്നതിന് സഹായിച്ചതായി ഇരു നേതാക്കളും സമ്മതിച്ചു.
കോവിഡ് കാലത്ത് പ്രവാസി ഇന്ത്യക്കാര്ക്ക് സൗദി നല്കുന്ന സഹായങ്ങള്ക്ക് പ്രധാനമന്ത്രി, സല്മാന് രാജാവിന് നന്ദി അറിയിച്ചു. ഇന്ത്യയും സൗദിയും തമ്മില് നിലനില്ക്കുന്ന ബന്ധത്തില് സംതൃപ്തി പ്രകടിപ്പിച്ച ഇരു രാഷ്ട്ര നേതാക്കളും ബന്ധം കൂടുതല് ശക്തമാക്കാനും തീരുമാനിച്ചിട്ടുണ്ട്.