ന്യൂഡെൽഹി: ഫ്രാന്‍സിസ് മാര്‍പാപ്പയുമായി പ്രധാനമന്ത്രി നരേന്ദ്ര മോദി കൂടിക്കാഴ്‌ച നടത്തും. വരുന്ന വെള്ളിയാഴ്‌ച വത്തിക്കാനില്‍ വെച്ചാണ് കൂടിക്കാഴ്‌ച. റോമില്‍ വെച്ച് നടക്കുന്ന ജി-20 ഉച്ചകോടിക്ക് മുൻപായാണ് കൂടിക്കാഴ്‌ച നടക്കുക. ഒക്‌ടോബര്‍ 30നാണ് മോദി ജി-20 യോഗത്തില്‍ പങ്കെടുക്കുക.
ഒക്‌ടോബര്‍ 28ന് മോദി വത്തിക്കാനിലെത്തി മാര്‍പാപ്പയെ കാണുമെന്നാണ് ദേശീയ മാദ്ധ്യമങ്ങള്‍ റിപ്പോര്‍ട് ചെയ്യുന്നത്. ഒക്‌ടോബര്‍ 30,31 തീയതികളിലായാണ് ജി-20 ഉച്ചകോടി നടക്കുക. ഇവിടെ നിന്നും സ്‍കോട്‍ലൻഡിലെ ഗ്ളാസ്‍കോയിലേക്ക് തിരിക്കുന്ന പ്രധാനമന്ത്രി നവംബർ ഒന്നിന് ഇവിടെ കോപ്-26 ഉച്ചകോടിയിലും (യുണൈറ്റഡ് നേഷൻ ക്‌ളൈമറ്റ് ചേഞ്ച് കോൺഫറൻസ്) സംസാരിക്കും.
ഇതിന് അനുബന്ധമായി കാലാവസ്‌ഥാ മാറ്റം സംബന്ധിച്ച ഉച്ചകോടിയിൽ ബ്രിട്ടീഷ് പ്രധാനമന്ത്രി ബോറിസ് ജോൺസനൊപ്പം മോദി പങ്കെടുക്കും. അഫ്ഗാനിലെ താലിബാൻ ഭരണം ആയിരിക്കും ജി-20യിലെ പ്രധാന ചർച്ചാ വിഷയം. ഇന്തോ-പസഫിക് മേഖലയിലെ ചൈനീസ് നീക്കങ്ങളും ഉച്ചകോടിയിൽ ചർച്ചയായേക്കും.
Read Also: കോട്ടയത്തിന്റെ കിഴക്കൻ മേഖലകളിൽ വീണ്ടും കനത്ത മഴ
