അമൃത്‌സർ: കോവിഡ് മഹാമാരിയിൽ മാതാപിതാക്കളെ നഷ്‌ടമായ കുട്ടികളുടെ ഉത്തരവാദിത്തം ഏറ്റെടുത്ത് പഞ്ചാബ് സർക്കാർ. ബിരുദതരം വരെ കുട്ടികൾക്ക് സൗജന്യ വിദ്യാഭ്യാസം നൽകാനും പ്രതിമാസം 1500 രൂപ സാമൂഹ്യ സുരക്ഷാ പെൻഷനായി നൽകാനും തീരുമാനമായി. ഗൃഹനാഥനെ നഷ്‌ടപ്പെട്ട കുടുംബങ്ങൾക്ക് സാമ്പത്തിക സഹായം നൽകുമെന്നും പഞ്ചാബ് സർക്കാർ വ്യക്‌തമാക്കി. ജൂലൈ ഒന്ന് മുതൽ ഈ വിഭാഗക്കാർക്ക് ആനുകൂല്യങ്ങൾ ലഭ്യമാക്കി തുടങ്ങും.
കോവിഡ് മൂലം അനാഥരായ കുട്ടികൾക്കും ഗൃഹനാഥനെ നഷ്‌ടമായ കുടുംബത്തിലെ കുട്ടികൾക്കും സർക്കാർ സ്‌ഥാപനങ്ങളിലൂടെയാണ് വിദ്യാഭ്യാസം ഒരുക്കുക. തങ്ങളുടെ മാതാപിതാക്കളെ നഷ്‌ടമായ കുട്ടികൾക്ക് വളർത്തച്ഛനാകേണ്ട ഉത്തരവാദിത്തം സർക്കാരിനുണ്ടെന്ന് പഞ്ചാബ് മുഖ്യമന്ത്രി അമരീന്ദർ സിങ് പറഞ്ഞു.
അനാഥരായ കുട്ടികൾക്ക് 21 വയസ് തികയുന്നത് വരെയും ഗൃഹനാഥനില്ലാത്ത കുടുംബങ്ങൾക്ക് മൂന്ന് വർഷം വരെയുമാണ് ആനുകൂല്യങ്ങൾ ലഭിക്കുക. അതിനുശേഷം സ്‌ഥിതിഗതികൾ വിലയിരുത്തി തീരുമാനമെടുക്കുമെന്ന് മുഖ്യമന്ത്രിയുടെ ഓഫീസ് അറിയിച്ചു.
അതേസമയം, കോവിഡ് ബാധിതർക്ക് 51,000 രൂപ ഗ്രാന്റ് നൽകുന്ന ആശിർവാദ് പദ്ധതിക്ക് ജൂലൈ ഒന്ന് മുതൽ തുടക്കമാകും. ഇവർക്ക് സംസ്‌ഥാന സ്‌മാർട് റേഷൻ കാർഡ് പദ്ധതി പ്രകാരം സൗജന്യ റേഷനും സർബത്ത് സേഹത്ത് യോജനക്ക് കീഴിൽ ഇൻഷുറൻസ് പരിരക്ഷ ലഭിക്കുമെന്നും സർക്കാർ അറിയിച്ചു. ദുരിതബാധിതരായ കുടുംബാംഗങ്ങൾക്ക് അനുയോജ്യമായ ജോലി കണ്ടെത്തുന്നതിനും പ്രത്യേക പദ്ധതി പ്രഖ്യാപിച്ചിട്ടുണ്ട്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
