തിരുവനന്തപുരം: സംസ്‌ഥാനത്തെ പൊതുവിതരണ കേന്ദ്ര വ്യാപാരികൾ നാളെ കട അടച്ചിട്ട് പ്രതിഷേധിക്കും. തിരുവനന്തപുരത്ത് ലൈസൻസ് റദ്ദായ റേഷൻ കട സിവിൽ സപ്‌ളൈസ് കോർപ്പറേഷൻ നേരിട്ട് നടത്താൻ തീരുമാനിച്ചിരുന്നു. ഈ കടയുടെ ഉൽഘാടനം നാളെ നടക്കാനിരിക്കെയാണ് വ്യാപാരികളുടെ പ്രതിഷേധം. ചില സംഘടനകൾ രാവിലെയും മറ്റു സംഘടനകൾ ഉച്ചക്ക് ശേഷവുമാണ് കടകൾ അടച്ചിടുക.
റേഷൻ കടകൾ സപ്‌ളൈകോ ഏറ്റെടുക്കാനുള്ള തീരുമാനം പിൻവലിക്കുക, അല്ലെങ്കിൽ റേഷൻ ജീവനക്കാരെ സർക്കാർ ജീവനക്കാരായി അംഗീകരിക്കുക, സംഘടന നൽകിയ നിവേദനത്തിലെ ആവശ്യങ്ങൾ നടപ്പിലാക്കുക, റേഷൻ വാതിൽപ്പടി വിതരണത്തിൽ സിവിൽ സപ്‌ളൈസ്, സപ്‌ളൈകോ ഉദ്യോഗസ്‌ഥരുടെ വീഴ്ചകൾക്കെതിരെ കർശന നടപടികൾ സ്വീകരിക്കുക എന്നീ ആവശ്യങ്ങൾ ഉന്നയിച്ചാണ് റേഷൻ കടകൾ അടച്ച് പ്രതിഷേധിക്കുന്നത്.
കേരള റേഷൻ എംപ്ളോയീസ് യൂണിയൻ, ഓൾ കേരള റേഷൻ ഡീലേഴ്‌സ് അസോസിയേഷൻ, കേരള സ്‌റ്റേറ്റ് റീട്ടൈയിൽ അസോസിയേഷൻ തുടങ്ങിയ സംഘടനകളാണ് പ്രതിഷേധത്തിൽ പങ്കെടുക്കുന്നത്.
Read also: ലൈഫ് മിഷന്‍ കേസ്; മുഖ്യമന്ത്രി ഒന്നാം പ്രതിയെന്ന് രമേശ് ചെന്നിത്തല
