തിരുവനന്തപുരം: സിസ്റ്റര് അഭയ കേസിലെ സാക്ഷി പിറവം പൊലീസ് സര്ക്കിള് ഇന്സ്പെക്ടറെ വിസ്തരിക്കുന്നതില് നിന്നും പ്രതിഭാഗം പിന്മാറി. ഈ മാസം 16ന് സാക്ഷിയെ വിസ്തരിക്കാന് തിരുവനന്തപുരം സിബിഐ കോടതി ഉത്തരവ് നല്കിയതിന് ശേഷമാണ് പ്രതിഭാഗത്തിന്റെ പിന്മാറ്റം.
പിറവം പൊലീസ് സര്ക്കിള് ഇന്സ്പെക്ടറുടെ അധികാര പരിധിയില് 2007ല് ആത്മഹത്യ ചെയ്ത വ്യക്തി അഭയയുടെ അമ്മാവനാണെന്ന് സ്ഥാപിക്കാന് വേണ്ടിയാണ് സര്ക്കിള് ഇന്സ്പെക്ടറെ വിസ്തരിക്കുവാന് പ്രതിഭാഗം നീക്കം നടത്തിയത്.
എന്നാല് 1992ല് നടന്ന അഭയ കേസുമായി 2007ലെ ആത്മഹത്യക്ക് ബന്ധമുണ്ടെന്ന് തെളിയിക്കുവാന് എന്ത് രേഖയാണ് കയ്യിലുള്ളതെന്ന് സിബിഐ ജഡ്ജി കെ സനല് കുമാര് പ്രതിഭാഗത്തോട് ചോദിച്ചു. ശേഷം സാക്ഷിയെ വിസ്തരിക്കുന്നതില് നിന്നും പ്രതിഭാഗം പിന്മാറികൊണ്ട് ഹരജി ഫയല് ചെയ്യുകയായിരുന്നു. 1992 മാര്ച്ച് 27 നാണ് ബിസിഎം കോളേജ് വിദ്യാര്ഥിനിയായിരുന്ന സിസ്റ്റര് അഭയയെ ഹോസ്റ്റല് വളപ്പിലെ കിണറില് മരിച്ച നിലയില് കണ്ടെത്തിയത്
Read also: കസ്റ്റംസിന് അനുമതി; എം ശിവശങ്കറിനെ 16 ന് ചോദ്യം ചെയ്യും