സാധാരണഗതിയിൽ മോഷണങ്ങൾ ആരും പ്രോൽസാഹിപ്പിക്കാറോ അത് കണ്ട് ആസ്വദിക്കാറോ ഇല്ല. എന്നാൽ, സ്‌കോട്‌ലന്‍ഡിലെ അബെര്‍ഡീനിലുള്ള ഒരു കടയിൽ നടന്ന മോഷണ വീഡിയോ കണ്ട എല്ലാവരും അത് നന്നായി ആസ്വദിച്ചു. ആസ്വദിക്കുക മാത്രമല്ല ‘മോഷ്‌ടാവിനെ’ അളവറ്റങ് പുകഴ്‌ത്തുകയും ചെയ്‌തു. ഈ മോഷണ വീഡിയോ ഇപ്പോൾ സോഷ്യൽ മീഡിയയിൽ വൈറലാണ്.
കടയുടെ അകത്ത് കയറാൻ തക്കംപാർത്തിരുന്ന ഒരു കടൽകാക്കയാണ് ഈ മോഷണ വീഡിയോയിലെ ‘കള്ളൻ’. പതുക്കെ അടിവെച്ചടിവെച്ച് കടയുടെ ഓട്ടോമാറ്റിക് വാതിലിന് മുമ്പില്‍ അകത്തുകയറാൻ ഒരു അവസരത്തിനായി കാത്തു നില്‍ക്കുകയാണ് ആ കടൽകാക്ക.
കടയിലെത്തിയ ഒരാള്‍ പുറത്തേക്ക് കടന്നതോടെ ആ കടൽകാക്ക തന്ത്രപൂര്‍വം ഉള്ളില്‍ കടന്നു. നേരെ ചെന്ന് ഒരു പാക്കറ്റ് ചിപ്‌സും കൊത്തിയെടുത്ത് തിരികെ വാതില്‍ക്കലേക്ക് ഗമയിൽ ഒറ്റ നടപ്പ്. ഓട്ടോമാറ്റിക് വാതിലായതിനാല്‍ ആള്‍ പെരുമാറ്റമുണ്ടായതോടെ തുറന്നു. കടൽകാക്ക ഞാൻ ഒന്നും അറിഞ്ഞില്ലേ എന്ന ഭാവത്തിൽ പുറത്തേക്ക് നടന്നു.
പുറത്തെത്തിയ ശേഷം പാക്കറ്റ് കൊത്തിപ്പൊട്ടിക്കാനുള്ള ശ്രമത്തിലാണ് പിന്നെയവന്‍. പാക്കറ്റ് പൊട്ടിച്ച് ചിപ്‌സ് കഴിക്കുകയും ചെയ്യുന്നുണ്ട് പക്ഷി. നീല്‍ ട്രേയ്‌നര്‍ എന്നയാളാണ് വീഡിയോ അബെര്‍ഡീന്‍ ഇന്‍ കളര്‍ എന്ന ഫേസ്ബുക്ക് പേജില്‍ പങ്കുവച്ചത്. നിമിഷ നേരംകൊണ്ട് തന്നെ വീഡിയോ വൈറലായി. ആറായിരത്തിലധികം പേരാണ് വീഡിയോ ഷെയര്‍ ചെയ്‌തത്‌.
Also Read: കടൽ തീരത്ത് കുസൃതിയുമായി രണ്ട് വളർത്തു നായകൾ; വീഡിയോ കാണാം
