മുംബൈ: വെസ്റ്റ് ഇൻഡീസിന് എതിരായുള്ള ഏകദിന, ടി-20 പരമ്പരകൾക്കുള്ള ഇന്ത്യൻ ടീമിൽ മലയാളി സ്പിന്നർ എസ് മിഥുൻ സ്ഥാനം പിടിച്ചു. റിസർവ് നിരയിലാണ് ആലപ്പുഴ കായംകുളം സ്വദേശിയായ മിഥുൻ സ്ഥാനം പിടിച്ചിരിക്കുന്നത്.
ഏഴംഗ റിസർവ് ടീമിൽ ഉൾപ്പെട്ട മിഥുൻ അഹദാബാദിലെത്തിയിട്ടുണ്ട്. മലയാളി താരത്തിനൊപ്പം തമിഴ്നാട് താരങ്ങളായ ഷാരൂഖ് ഖാൻ, സായ് കിഷോർ, മധ്യപ്രദേശ് ക്യാപ്റ്റൻ ഋഷി ധവാൻ, മുംബൈ സ്പിന്നർ രാഹുൽ ചഹാർ തുടങ്ങിയവരും റിസർവ് നിരയിലുണ്ട്.
കഴിഞ്ഞ 4 വർഷമായി കേരള ടീമിലെ സ്ഥിര സാന്നിധ്യമാണ് മിഥുൻ. കഴിഞ്ഞ വർഷം സയ്യിദ് മുഷ്താഖ് അലി ട്രോഫിയിൽ കേരളത്തിനായി അഞ്ച് മൽസരങ്ങളിൽ നിന്ന് 9 വിക്കറ്റ് നേടിയ മിഥുൻ ടീമിന്റെ ഏറ്റവും ഉയർന്ന വിക്കറ്റ് ടേക്കറായി.
ഈ പ്രകടനമാണ് മിഥുന് ദേശീയ ടീമിലേക്ക് സ്ഥാനം നേടിക്കൊടുത്തത്. മൂന്ന് വീതം ഏകദിന, ടി-20 മൽസരങ്ങൾ അടങ്ങിയ പരിമിത ഓവർ പരമ്പരകൾ അടുത്ത മാസം 6നാണ് ആരംഭിക്കുക.
Read Also: കൈക്കൂലി കേസ്; എംജി സർവകലാശാല ജീവനക്കാരിയെ കോടതിയിൽ ഹാജരാക്കും