മലപ്പുറം: പാണക്കാട് സയ്യിദ് മുഹമ്മദലി ശിഹാബ് തങ്ങളുടെ വിയോഗത്തിന്റെ പന്ത്രണ്ടാം ആണ്ട് ദിനമായ ഇന്നലെ പാണക്കാട് വീട്ടിൽ ഉറൂസ് ചടങ്ങുകള്‍ സംഘടിപ്പിച്ചു. പുത്രന്‍ സയ്യിദ് ബഷീറലി ശിഹാബ് തങ്ങളുടെ വസതിയായ അല്‍ മര്‍ജാനിലാണ് കുടുംബാംഗങ്ങളും സ്‌നേഹ ബന്ധുക്കളും ഒരുമിച്ചു ചേര്‍ന്നത്.
രാവിലെ പാണക്കാട് മഖാമില്‍ സിയറാത്ത് നടന്നു. തുടര്‍ന്നു ഉറൂസ് ചടങ്ങുകള്‍ നടന്നു. ദിക്‌റ്, മൗലീദ് പാരായണം,പ്രാര്‍ഥന തുടങ്ങി ഭക്‌തി സാന്ദ്രമായ സംഗമത്തിന് പാണക്കാട് സയ്യിദ് ഹൈദരലി ശിഹാബ് തങ്ങള്‍, സയ്യിദ് സാദിഖലി ശിഹാബ് തങ്ങള്‍, സയ്യിദ് അബ്ബാസലി ശിഹാബ് തങ്ങള്‍, സയ്യിദ് ബഷീറലി ശിഹാബ് തങ്ങള്‍, സയ്യിദ് മുനവ്വറലി ശിഹാബ് തങ്ങള്‍, സയ്യിദ് റശീദലി ശിഹാബ് തങ്ങള്‍, സയ്യിദ് ലുഖ്‌മാൻ ഹദ്ദാദ് തങ്ങള്‍ കുറ്റിപ്പുറം, സയ്യിദ് യൂസുഫ് തങ്ങള്‍ കൊയിലാണ്ടി ഉൾപ്പെടെയുള്ള തങ്ങള്‍ കുടുംബാംഗങ്ങള്‍ ഉറൂസിന് നേതൃത്വം നല്‍കി.
പാണക്കാട് മുദരിസ് ഹബീബ് ഫൈസി പുഴക്കാട്ടിരി, പികെ ഹൈദ്രു ഹാജി, പികെ കുഞ്ഞാലിക്കുട്ടി, പി ഉബൈദുല്ല തുടങ്ങി മത-സാമൂഹ്യ-രാഷ്‌ട്രീയ രംഗത്തെ നിരവധി വ്യക്‌തിത്വങ്ങളും ഉറൂസിൽ പങ്കെടുത്തു. ആണ്ടുദിനമായ ഇന്നലെ നാടിന്റെ നാനാഭാഗങ്ങളിലായി ശിഹാബ് തങ്ങള്‍അനുസ്‌മരണ സദസുകള്‍ സംഘടിപ്പിച്ചിരുന്നു. ഹിജറ കലണ്ടറിലെ ശഅബാന്‍ പത്തിനാണ് സയ്യിദ് മുഹമ്മദലി ശിഹാബ് തങ്ങള്‍ അന്തരിച്ചത്.
Most Read: രാഹുലിനെതിരെ കോടതിയലക്ഷ്യം; അറ്റോര്‍ണി ജനറല്‍ അനുമതി നിഷേധിച്ചു
