ഇന്‍ഡോര്‍: ഹിന്ദു ദൈവങ്ങളെ അപമാനിച്ചെന്ന പരാതിയില്‍ അറസ്‌റ്റിലായ സ്‌റ്റാന്‍ഡ്അപ് കൊമേഡിയന്‍ മുനവര്‍ ഫാറൂഖിയുടെ ജാമ്യാപേക്ഷ തള്ളി. കേസില്‍ അറസ്‌റ്റിലായ നലിന്‍ യാദവിനും ജാമ്യം അനുവദിച്ചില്ല. അഡീഷണല്‍ ജില്ലാ ആന്റ് സെഷന്‍ കോടതി ജഡ്ജായ യതീന്ദ്ര കുമാര്‍ ഗുരുവാണ് മുനാവറിന്റെയും നലിന്റെയും ജാമ്യാപേക്ഷ തള്ളിയത്.
എന്നാല്‍ ഹിന്ദുദൈവങ്ങളെ അപമാനിക്കുന്ന രീതിയില്‍ മുനവര്‍ സംസാരിച്ചിട്ടില്ലെന്നും അടിസ്‌ഥാനമില്ലാത്ത ആരോപണങ്ങളാണ് ഉന്നയിച്ചിരിക്കുന്നതെന്നും മുനവറിന് വേണ്ടി ഹാജരായ അഭിഭാഷകന്‍ അന്‍ഷുമന്‍ ശ്രീവാസ്‌തവ പറഞ്ഞു.
പുതുവല്‍സര ആഘോഷങ്ങളുടെ ഭാഗമായി ഇന്‍ഡോറിലെ കഫേയില്‍ നടന്ന പരിപാടിയില്‍ അമിത് ഷായെയും ഹിന്ദു മത വിശ്വാസങ്ങളെയും മുനവര്‍ ഫാറൂഖി പരിഹസിച്ചുവെന്ന പരാതിയെ തുടര്‍ന്നായിരുന്നു അറസ്‌റ്റ്.
ഇദ്ദേഹത്തെ കൂടാതെ സംഘാടകരായ നാല് പേരെയും പോലീസ് അറസ്‌റ്റ് ചെയ്‌തിരുന്നു. എഡ്വിന്‍ ആന്റണി, പ്രഖാര്‍ വ്യാസ്, പ്രിയം വ്യാസ്, നലിന്‍ യാദവ് എന്നിവരാണ് അറസ്‌റ്റിലായത്. ഐപിസി 188, 269, 34, 295എ എന്നീ വകുപ്പുകള്‍ പ്രകാരമായിരുന്നു ഇവര്‍ക്കെതിരെ കേസെടുത്തത്.
Read also: ആന്ധ്രയില്‍ ക്ഷേത്രങ്ങള്‍ക്ക് നേരെയുള്ള ആക്രമണങ്ങളില്‍ പ്രതിഷേധവുമായി ബിജെപി
