കോട്ടയം: ബിരുദ വിദ്യാർഥിയുടെ ആത്‍മഹത്യയെ തുടർന്ന് വിദ്യാർഥി പ്രതിഷേധം ശക്‌തമായ കാഞ്ഞിരപ്പള്ളി അമൽജ്യോതി എൻജിനിയറിങ് കോളേജിൽ മന്ത്രിമാരുടെ സംഘം ഇന്ന് സന്ദർശനം നടത്തും. വിദ്യാർഥികൾ ഉന്നയിക്കുന്ന ആവശ്യങ്ങൾക്ക് പരിഹാരം കാണാൻ വിദ്യാർഥി പ്രതിനിധികളും മാനേജ്‌മെന്റുമായി ഉന്നതവിദ്യാഭ്യാസ മന്ത്രി ആർ ബിന്ദു, സഹകരണ രജിസ്ട്രേഷൻ മന്ത്രി വിഎൻ വാസവൻ എന്നിവർ ഇന്ന് ചർച്ച നടത്തും.
ഇന്ന് രാവിലെ പത്ത് മണിക്ക് കോളേജിൽ വെച്ചാകും ചർച്ച നടക്കുക. പ്രതിഷേധത്തിൽ അനുനയ നീക്കത്തിനാണ് സർക്കാർ ശ്രമം നടത്തുന്നത്. ആരോപണ വിധേയരായ അധ്യാപകർക്ക് എതിരെ നടപടി വേണമെന്ന നിലപാടിൽ ഉറച്ചു നിൽക്കുകയാണ് വിദ്യാർഥികൾ. അതേസമയം, സംഭവത്തിൽ സാങ്കേതിക സർവകലാശാലയുടെ അന്വേഷണവും ഇന്ന് തുടങ്ങും.
മാനേജ്‌മെന്റിനെതിരേ വിദ്യാർഥികൾ നടത്തുന്ന സമരം കഴിഞ്ഞ ദിവസം ഏറെ വൈകിയും തുടർന്നിരുന്നു. ശ്രദ്ധയെ മാനസികമായി പീഡിപ്പിച്ച ഹോസ്‌റ്റൽ വാർഡനും ഫുഡ് ടെക്‌നോളജി ഡിപ്പാർട്മെന്റ് മേധാവിക്കുമെതിരെ നടപടിയെടുത്ത് ചുമതലകളിൽ നിന്ന് മാറ്റിനിർത്തണമെന്നാണ് വിദ്യാർഥികളുടെ ആവശ്യം. പോലീസ് നടപടി വൈകുന്നതിലും വിദ്യാർഥികൾക്ക് അമർഷമുണ്ട്. ഈ സാഹചര്യത്തിൽ ഇന്ന് നടക്കുന്ന ചർച്ച നിർണായകമാണ്.
Most Read: ബിപോർജോയ് ചുഴലിക്കാറ്റ്; അടുത്ത മണിക്കൂറുകളിൽ തീവ്രമാകും- കനത്ത മഴക്ക് സാധ്യത
