ന്യൂഡെല്ഹി : അഭിഭാഷകന് പ്രശാന്ത് ഭൂഷണിനെതിരെയുള്ള തെഹല്ക കോടതിയലക്ഷ്യ കേസ് പരിഗണിക്കുന്നത് അടുത്തമാസം 12 ലേക്ക് സുപ്രീംകോടതി മാറ്റി. കേസില് അമിക്കസ് ക്യൂറിയായി നിയമിതനാകാന് അറ്റോര്ണി ജനറല് കെ കെ വേണുഗോപാലിന് കത്തയക്കാനും കോടതി നിര്ദ്ദേശിച്ചു. ജസ്റ്റിസ് എ എം ഖാന്വില്ക്കര് അധ്യക്ഷനായ മൂന്നംഗ ബെഞ്ചാണ് കേസ് പരിഗണിച്ചത്. 2009 ല് തെഹല്ക മാസികക്ക് നല്കിയ അഭിമുഖത്തില് കോടതിയലക്ഷ്യ പരാമര്ശം നടത്തിയെന്നാണ് പ്രശാന്ത് ഭൂഷണിനെതിരെയുള്ള കേസ്. മുന് ചീഫ് ജസ്റ്റിസുമാരില് ചിലര് അഴിമതിക്കാരാണെന്നായിരുന്നു മാസികക്ക് നല്കിയ അഭിമുഖത്തില് പ്രശാന്ത് ഉന്നയിച്ച ആരോപണം.
ജസ്റ്റിസ് അരുണ് മിശ്ര അധ്യക്ഷനായ ബെഞ്ച് പരിഗണിച്ച ഈ കേസ് പിന്നീട് അരുണ് മിശ്ര അദ്ദേഹത്തിന്റെ വിരമിക്കല് ചൂണ്ടിക്കാട്ടി മറ്റൊരു ബെഞ്ചിന് കൈമാറുകയായിരുന്നു. എന്നാല് ചീഫ് ജസ്റ്റിസുമാരെ വിമര്ശിച്ചു കൊണ്ട് നടത്തിയ ട്വീറ്റില് അരുണ് മിശ്ര അധ്യക്ഷനായ ബെഞ്ച് പ്രശാന്തിന് ഒരു രൂപ ശിക്ഷ വിധിച്ചിരുന്നു. പിഴയൊടുക്കിയില്ലെങ്കില് 3മാസം തടവും 3 വര്ഷം പ്രാക്ടീസ് വിലക്കുകയും ചെയ്യുമെന്നാണ് വിധിയില് പറയുന്നത്.