കൊച്ചി: സ്വര്‍ണക്കടത്ത് കേസിലെ മുഖ്യപ്രതി സ്വപ്‌ന സുരേഷ് വിദേശത്തേക്ക് നിയമവിരുദ്ധമായി 1,90,000 ഡോളര്‍ കടത്തിയെന്ന് കസ്‌റ്റംസ്. കോണ്‍സുലേറ്റിലെ തിരിച്ചറിയല്‍ കാര്‍ഡ് ഉപയോഗിച്ചാണ് ഡോളര്‍ കടത്തിയത്. ഇതു സംബന്ധിച്ച് കസ്‌റ്റംസ് കോടതിയില്‍ റിപ്പോര്‍ട്ട് സമര്‍പ്പിച്ചതായി മാതൃഭൂമി ന്യൂസ് റിപ്പോര്‍ട്ട് ചെയ്‌തു.
ലൈഫ് മിഷന്‍ ഇടപാടിലെ കമ്മീഷന്‍ തുകയാണോ ഡോളറാക്കി വിദേശത്തേക്ക് കടത്തിയതെന്ന് കസ്‌റ്റംസ് അന്വേഷിക്കുകയാണ്. ഇതില്‍ വ്യക്‌തത വരുത്താനാണ് സ്വപ്‌ന സുരേഷ് അടക്കമുള്ള പ്രതികളെ കസ്‌റ്റംസ് ജയിലില്‍ വെച്ച് ചോദ്യം ചെയ്യുന്നതെന്നാണ് റിപ്പോര്‍ട്ട്. അപ്രതീക്ഷിതമായി ജയിലിലെത്തിയാണ് കസ്‌റ്റംസ് ചോദ്യം ചെയ്യുന്നത്.
അതേസമയം മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനേയും കസ്‌റ്റംസ് ചോദ്യം ചെയ്യുന്നുമുണ്ട്. എം.ശിവശങ്കറിനെ തുടര്‍ച്ചയായി രണ്ടാം ദിവസമാണ് കൊച്ചിയിലെ കസ്‌റ്റംസ് ഓഫീസില്‍ വച്ച് ചോദ്യം ചെയ്യുന്നത്. സ്വപ്‌നയും ശിവശങ്കറും തമ്മിലുള്ള സാമ്പത്തിക ബന്ധത്തെക്കുറിച്ചും കസ്‌റ്റംസ് അന്വേഷിച്ചുവരികയാണ്.
ലൈഫ് മിഷന്‍ ഇടപാടിനായി 3 കോടി 60 ലക്ഷം രൂപ ഡോളറാക്കി യുഎഇ കോണ്‍സുലേറ്റിലെ ഉദ്യോഗസ്ഥനായ ഈജിപ്ഷ്യന്‍ സ്വദേശി ഖാലിദിന് കൈമാറിയെന്ന് യൂണിടാക് ഉടമ സന്തോഷ് ഈപ്പന്‍ മൊഴി നല്‍കിയിരുന്നു. അതില്‍ നിന്നാണോ വിദേശത്തേക്ക് സ്വപ്‌ന ഡോളര്‍ കടത്തിയതെന്നാണ് കസ്‌റ്റംസ് പരിശോധിച്ചു വരുന്നത്.
Read Also: ടൂറിസം രംഗത്ത് കുതിപ്പുമായി മഞ്ഞംപൊതികുന്ന്
