കോഴിക്കോട്: ഇന്ധനം നിറയ്ക്കാൻ പെട്രോൾ പമ്പിലെത്തിയ വാഹനത്തിന് തീപിടിച്ചു. താമരശ്ശേരി വട്ടോളിയിലെ പെട്രോൾ പമ്പിൽ ഇന്ന് രാവിലെ പതിനൊന്ന് മണിയോടെയാണ് സംഭവം. ഓംനി വാനാണ് കത്തി നശിച്ചത്. നാട്ടുകാരുടെ സമയോചിത ഇടപെടൽ മൂലം വൻ ദുരന്തമാണ് ഒഴിവായത്.
ഇന്ധനം നിറയ്ക്കാനായി കാത്തുനിൽക്കുന്നതിനിടെ വാഹനത്തിന്റെ ഉള്ളിൽ നിന്ന് തീയും പുകയും ഉയരുകയാണ് ഉണ്ടായത്. ഇതോടെ പെട്രോൾ പമ്പിലെ ആളുകളെല്ലാം പരിഭ്രാന്തരായി. തുടർന്ന് ഡ്രൈവർ വാഹനത്തിൽ നിന്നിറങ്ങി പുറത്തേക്ക് ഓടുകയായിരുന്നു. ഉടൻതന്നെ തീ ആളിക്കത്തുകയും ചെയ്തിരുന്നു.
ജീവനക്കാർ ഉടൻതന്നെ അഗ്നിശമന ഉപകരണം പ്രയോഗിക്കുകയും നാട്ടുകാർ ചേർന്ന് വാഹനം പമ്പിന്റെ പുറത്തേക്ക് മാറ്റുകയും ചെയ്തു. നരിക്കുനിയിൽ നിന്നുള്ള ഫയർഫോഴ്സും സംഭവസ്ഥലത്ത് എത്തിയതോടെയാണ് തീ നിയന്ത്രണവിധേയമാക്കിയത്.
Read Also: കാലവർഷം; വയനാട്ടിൽ ലഭിച്ചത് 30.5 ശതമാനം കുറവ് മഴ