തിരുവനന്തപുരം: രണ്ടാം എല്ഡിഎഫ് സര്ക്കാരിലെ സിപിഎം മന്ത്രിമാരെ തീരുമാനിച്ചു. രാവിലെ നടന്ന സിപിഎം പൊളിറ്റ് ബ്യൂറോ നേതാക്കളുടെ യോഗവും തുടർന്ന് ചേർന്ന സംസ്ഥാന സെക്രട്ടറിയേറ്റുമാണ് മന്ത്രിമാരുടെ കാര്യത്തില് തീരുമാനമെടുത്തത്.
പിണറായി വിജയന് തന്നെ മുഖ്യമന്ത്രിയായി തുടരും. മന്ത്രിസഭയിലെ ബാക്കിയെല്ലാവരും പുതുമുഖങ്ങളാണ്. എംവി ഗോവിന്ദന്, വി അബ്ദുറഹ്മാന്, മുഹമ്മദ് റിയാസ് (പിണറായി വിജയന്റെ മരുമകൻ), ആര് ബിന്ദു, വീണ ജോര്ജ്, കെഎന് ബാലഗോപാല്, വിഎന് വാസവന്, പി രാജീവ്, കെ രാധാകൃഷ്ണൻ, വി ശിവന്കുട്ടി, സജി ചെറിയാന് എന്നിവരാണ് മന്ത്രിമാരുടെ പട്ടികയില് ഉള്പ്പെട്ടത്. ഇവരുടെ വകുപ്പുകള് തീരുമാനിച്ചിട്ടില്ല.
മന്ത്രിമാരുടെ പട്ടികയിലെ ഏറ്റവും പ്രത്യേകത കെകെ ശൈലജക്ക് ഇടമില്ല എന്നുള്ളതാണ്. പാര്ട്ടി വിപ്പായാണ് കെകെ ശൈലജയെ തീരുമാനിച്ചിരിക്കുന്നത്. പിണറായി ഒഴികെ മറ്റെല്ലാവരും പുതുമുഖങ്ങൾ ആവട്ടെയെന്ന തീരുമാനം അംഗീകരിക്കപ്പെട്ടതിന്റെ ഭാഗമായാണ് കെകെ ശൈലജയെ ഒഴിവാക്കിയിരിക്കുന്നത്.
Also Read: സിപിഐയുടെ മന്ത്രിമാരെയും തീരുമാനിച്ചു; മുഴുവൻ പുതുമുഖങ്ങൾ