ഇടുക്കി: ജില്ലയിലെ പൂപ്പാറയിൽ ഇതര സംസ്‌ഥാനക്കാരിയായ പെൺകുട്ടിയെ കൂട്ടബലാൽസംഗം ചെയ്‌ത കേസിൽ 2 പേർ കൂടി അറസ്‌റ്റിൽ. സംഭവത്തിന് പിന്നാലെ ഇന്നലെ തമിഴ്‌നാട്ടിലേക്ക് കടന്ന പ്രതികളെയാണ് പോലീസ് കസ്‌റ്റഡിയിൽ എടുത്തത്. ഇതോടെ കേസിൽ ഇതുവരെ പിടിയിലായ ആകെ പ്രതികളുടെ എണ്ണം 7 ആയി ഉയർന്നു.
സംഭവത്തിന് ശേഷം രണ്ട് പേര്‍ തമിഴ്‌നാട്ടിലേക്ക് കടന്നതായി പോലീസിന് ആദ്യം തന്നെ വിവരം ലഭിച്ചിരുന്നു. ഇവരെയാണ് ഇന്ന് കസ്‌റ്റഡിയിലെടുത്തത്. എന്നാൽ ഇതുവരെ ഇവരുടെ അറസ്‌റ്റ് രേഖപ്പെടുത്തിയിട്ടില്ല. ഇന്നലെ കേസിൽ 4 പേരുടെ അറസ്‌റ്റ് രേഖപ്പെടുത്തിയിരുന്നു. ഇവരിൽ രണ്ട് പേർ പ്രായപൂർത്തി ആകാത്തവർ ആണെന്നാണ് വിവരം. കൂടാതെ കേസിൽ കൂടുതൽ ആളുകൾക്ക് പങ്കുണ്ടെന്നാണ് പോലീസിന്റെ നിഗമനം.
ഇന്നലെ വൈകുന്നേരത്തോടെയാണ് പൂപ്പാറയിൽ സുഹൃത്തിനൊപ്പം എത്തിയ പെൺകുട്ടിയെ പ്രദേശവാസികളായ നാല് പേർ ചേർന്ന് ആക്രമിച്ചത്. സംഭവത്തില്‍ ഇന്നലെ തന്നെ പോലീസ് കേസെടുത്തിരുന്നു. കൂടാതെ പെണ്‍കുട്ടിയെ വൈദ്യ പരിശോധനക്ക് വിധേയയാക്കുകയും ചെയ്‌തു. തോട്ടം തൊഴിലാളി മേഖലയില്‍ ജോലിക്കായി മാതാപിതാക്കളോടൊപ്പം ഇടുക്കിയിലെത്തിയതാണ് 15കാരിയായ പെണ്‍കുട്ടി.
Read also: തൃക്കാക്കര വോട്ടെടുപ്പ് ചൂടിലേക്ക്; ആദ്യമണിക്കൂറിൽ 11.04 ശതമാനം പോളിങ്
