മലപ്പുറം: ജില്ലയിലെ പാണമ്പ്രയിൽ പോലീസെന്ന വ്യാജേന 11.40 ലക്ഷം രൂപ തട്ടിയെടുത്ത കേസിൽ 2 പേർ പിടിയിൽ. തൃശൂർ ഇരിങ്ങാലക്കുട കോമ്പാറ സ്വദേശികളായ നടുവിൽ വീട്ടിൽ എൻഎസ് ശ്രേയസ്(24), ചെറുപറമ്പിൽ വീട്ടിൽ മിഥുൻ മോഹൻ(24) എന്നിവരാണ് അറസ്റ്റിലായത്.
കഴിഞ്ഞ നവംബർ 30ആം തീയതിയാണ് കേസിനാസ്പദമായ സംഭവം ഉണ്ടായത്. ചെമ്മാട്ടേക്ക് ബൈക്കിൽ പോകുകയായിരുന്ന ചേലേമ്പ്ര പൈങ്ങോട്ടൂർ സ്വദേശിയുടെ ബൈക്ക് തട്ടിയെടുത്താണ് പണം കവർന്നത്. തുടർന്ന് ബൈക്ക് രാമനാട്ടുകരയ്ക്ക് സമീപമുള്ള എൻഎച്ച് ബൈപാസിൽ ഉപേക്ഷിക്കപ്പെട്ട നിലയിൽ കണ്ടെത്തുകയും ചെയ്തു.
കേസിൽ ഇനിയും പ്രതികളെ അറസ്റ്റ് ചെയ്യാനുണ്ടെന്ന് അന്വേഷണ സംഘം അറിയിച്ചു. സിസിടിവി ദൃശ്യങ്ങളും മറ്റും പരിശോധിച്ചാണ് കേസിൽ പോലീസ് പ്രതികളെ തിരിച്ചറിഞ്ഞത്. തേഞ്ഞിപ്പലം ഇൻസ്പെക്ടർ എൻബി ഷൈജു, എസ്ഐ സംഗീത് പുനത്തിൽ, സത്യനാഥൻ മനാട്ട്, ശശി കുണ്ടറക്കാട്, കെ അബ്ദുൽ അസീസ്, എം ഉണ്ണികൃഷ്ണൻ, സജ്ഞീവ്, വിപി രവീന്ദ്രൻ, റഫീഖ് മഞ്ഞറോടൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.
Read also: സിൽവർലൈൻ പദ്ധതി; കണ്ണൂരിൽ കല്ലിട്ടത് മൂന്നിലൊന്ന് ദൂരം മാത്രം