കണ്ണൂര്‍: ജില്ലയില്‍ ലോക എയ്ഡ്സ് ദിനാചരണത്തിന്റെ ഭാഗമായി ബോധവല്‍ക്കരണ പരിപാടികള്‍ സംഘടിപ്പിച്ചു. ജില്ലാ മെഡിക്കല്‍ ഓഫീസര്‍ ഡോ. കെ നാരായണ നായിക് പരിപാടിയുടെ ഉല്‍ഘാടനം നിര്‍വഹിച്ചു. ‘ഉത്തരവാദിത്വം പങ്കുവെക്കാം, ഐക്യദാര്‍ഢ്യം പ്രഖ്യാപിക്കാം’ എന്നതാണ് ഈ വര്‍ഷത്തെ ദിനാചരണ സന്ദേശം.
എച്ച്ഐവി ബാധ തടയുന്നതിനുള്ള സാമൂഹികമായ ഉത്തരവാദിത്വം നമുക്കെല്ലാവര്‍ക്കും ഉണ്ടെന്നും എയ്ഡ്സ് ബാധിതരെ ഒറ്റപ്പെടുത്തുകയല്ല മറിച്ച് രോഗത്തിനെതിരെ പൊരുതാന്‍ അവരോട് ഐക്യദാര്‍ഢ്യം പ്രകടിപ്പിക്കുകയാണ് നാം വേണ്ടതെന്നും ജില്ലാ മെഡിക്കല്‍ ഓഫീസര്‍ പറഞ്ഞു.
സുരക്ഷിതമായ ലൈംഗിക ബന്ധം, ലൈംഗിക ബന്ധത്തിലേര്‍പ്പെടുമ്പോള്‍ സുരക്ഷിത ഉറ ഉപയോഗിക്കുക, മയക്കുമരുന്നിന്റെ ഉപയോഗം പൂര്‍ണ്ണമായും ഒഴിവാക്കുക, അംഗീകൃത രക്‌തബാങ്കില്‍ നിന്ന് മാത്രം രക്‌തം സ്വീകരിക്കുക, ഗര്‍ഭിണികള്‍ മുന്‍കൂട്ടി എച്ച്ഐവി പരിശോധന നടത്തുകയും എച്ച്ഐവി ബാധിതരെങ്കില്‍ ശരിയായ ചികില്‍സയിലൂടെ കുഞ്ഞിലേക്കുള്ള വ്യാപനം തടയുകയും ചെയ്യുക എന്നിവയിലൂടെ നമുക്ക് എയ്ഡ്സ് നിയന്ത്രിക്കാം.
ചോല, ഹെല്‍ത്ത് ലൈന്‍ എന്നീ സന്നദ്ധ സംഘടനകളുടെയും നാഷണല്‍ സര്‍വ്വീസ് സ്‌കീം യൂണിറ്റുകളുടെയും സഹകരണത്തോടെ ദിനാചരണത്തിന്റെ ഭാഗമായി ജില്ലയുടെ വിവിധ ഭാഗങ്ങളില്‍ മെഴുകുതിരി തെളിയിക്കുകയും റെഡ് റിബണ്‍ ക്യാമ്പയിന്‍ സംഘടിപ്പിക്കുകയും ചെയ്‌തു.
ആരോഗ്യദൗത്യം ജില്ലാ പ്രോഗ്രാം മാനേജര്‍ ഡോ. പി കെ അനില്‍കുമാര്‍, ഡെപ്യൂട്ടി ജില്ലാ മെഡിക്കല്‍ ഓഫീസര്‍മാരായ ഡോ. എം കെ ഷാജ്, ഡോ. പ്രീത, എയ്ഡ്സ് നിയന്ത്രണ പരിപാടി നോഡല്‍ ഓഫീസര്‍ ഡോ. ജി അശ്വിന്‍, ജില്ലാ മാസ് മീഡിയ ഓഫീസര്‍ ഹംസ ഇസ്‌മായില്‍ എന്നിവര്‍ ചടങ്ങില്‍ സന്നിഹിതരായി.
Malabar News: ഫാഷൻ ഗോൾഡ് തട്ടിപ്പ്; വിചാരണക്കായി പ്രത്യേക കോടതി വേണം, പ്രതിഷേധ മാർച്ചുമായി നിക്ഷേപകർ
