കൊച്ചി : കൊച്ചിയിലെ ഷോപ്പിംഗ് മാളില്‍ വച്ച് യുവനടിയെ അപമാനിച്ച കേസില്‍ അന്വേഷണം വ്യാപിപ്പിക്കാന്‍ തീരുമാനിച്ച് പോലീസ്. ഇതിന്റെ ഭാഗമായി വടക്കന്‍ ജില്ലകളായ തൃശൂര്‍, കോഴിക്കോട്, കണ്ണൂര്‍ എന്നീ ജില്ലകളില്‍ അന്വേഷണം ആരംഭിക്കും. ഇതിനായി മൂന്ന് സംഘങ്ങളായി തിരിഞ്ഞ് പോലീസ് ഇവിടങ്ങളിലേക്ക് പുറപ്പെട്ടിട്ടുണ്ട്.
സംഭവദിവസം തന്നെ യുവാക്കള്‍ കൊച്ചി വിട്ടതായാണ് പോലീസ് കരുതുന്നത്. അതിനാല്‍ കൊച്ചി സൗത്ത് റെയില്‍വേ സ്‌റ്റേഷനില്‍ നിന്നും രാത്രി പുറപ്പെടുന്ന ദീര്‍ഘദൂര ട്രെയിനുകളുടെ സ്‌റ്റോപ്പുകള്‍ കേന്ദ്രീകരിച്ച് അന്വേഷണം നടത്തുന്നതിന്റെ ഭാഗമായാണ് ഇപ്പോള്‍ വടക്കന്‍ ജില്ലകളിലേക്ക് പോലീസ് അന്വേഷണം വ്യാപിപ്പിക്കുന്നത്.
എറണാകുളത്ത് നിന്നും വടക്കന്‍ ജില്ലകളിലുള്ള റെയില്‍വേ സ്‌റ്റേഷനുകളിലെ സിസിടിവി ദൃശ്യങ്ങള്‍ പരിശോധന നടത്തി പ്രതികളെ കണ്ടെത്താനുള്ള ശ്രമമാണ് ഇപ്പോള്‍ പോലീസ് നടത്തുന്നത്. ഒപ്പം തന്നെ പ്രതികളുടെ സിസിടിവി ദൃശ്യങ്ങള്‍ പുറത്തുവിട്ടതോടെ ഇവരുടെ വിവരങ്ങള്‍ പൊതുജനങ്ങളില്‍ നിന്ന് ലഭിക്കാനുള്ള സാധ്യതയുണ്ടെന്നും പോലീസ് അറിയിക്കുന്നുണ്ട്. ഷോപ്പിംഗ് മാളില്‍ നിന്നുള്ള സിസിടിവി ദൃശ്യങ്ങളില്‍ നിന്നും നടി തന്നെയാണ് പ്രതികളുടെ ദൃശ്യങ്ങള്‍ തിരിച്ചറിഞ്ഞത്. അതിന് ശേഷമാണ് പ്രതികളുടെ ചിത്രങ്ങള്‍ പോലീസ് പുറത്തുവിട്ടത്.
Read also : 5000 പേര്‍ക്ക് പ്രവേശനമില്ല; ശബരിമലയില്‍ കൂടുതല്‍ പേര്‍ക്ക് ബുക്കിംഗ് ആരംഭിച്ചില്ല
