മലപ്പുറം: കുറ്റിപ്പുറത്ത് പ്ളസ് വൺ വിദ്യാർഥികൾ അധ്യാപകനെ ക്രൂരമായി മർദ്ദിച്ചതായി പരാതി. കലോൽസവ പരിശീലന സ്ഥലത്ത് കറങ്ങിനടന്നു വിദ്യാർഥികളെ അധ്യാപകൻ ശകാരിച്ചിരുന്നു. ഇതിന് പ്രകോപിതരായി വിദ്യാർഥികൾ അധ്യാപകനെ മർദ്ദിക്കുകയായിരുന്നു. കുറ്റിപ്പുറം പേരശ്ശനൂർ ഗവ. ഹയർ സെക്കൻഡറി സ്കൂളിലെ അധ്യാപകനായ കുണ്ടിൽ ചോലയിൽ സജീഷിനാണ് (34) പരിക്കേറ്റത്.
ആക്രമണത്തിൽ അധ്യാപകന്റെ കൈക്കുഴ വേർപ്പെട്ടു. കുറ്റിപ്പുറം പേരശ്ശനൂർ ഗവ. ഹയർ സെക്കൻഡറി സ്കൂളിൽ ഇന്നലെ വൈകിട്ട് നാലരയോടെയാണ് സംഭവം. ഉപജില്ലാ കലോൽസവത്തിനായി പെൺകുട്ടികൾ പരിശീലനം നടത്തുന്ന സ്ഥലത്ത് അനാവശ്യമായി കറങ്ങിനടന്നു വിദ്യാർഥികളിൽ ചിലരെ അധ്യാപകർ ശകാരിച്ചു പ്രിൻസിപ്പലിന്റെ മുന്നിലെത്തിച്ചിരുന്നു.
ഇതിൽ പ്രകോപിതനായ വിദ്യാർഥി പ്രിൻസിപ്പലിന്റെ മുന്നിലിട്ട് അധ്യാപകനെ മർദ്ദിക്കുകയായിരുന്നു. വിദ്യാർഥി അധ്യാപകനെ കൈ പിന്നിലേക്ക് തിരിച്ചു പുറത്തു ചവിട്ടുകയായിരുന്നുവെന്ന് പറയുന്നു. ഇതോടെ അധ്യാപകന്റെ കൈക്കുഴ വേർപ്പെട്ടു. പരിക്കേറ്റ സജീഷ് ഗവ. താലൂക്ക് ആശുപത്രിയിൽ ചികിൽസ തേടി. അധ്യാപകന്റെ പരാതിയിൽ പോലീസ് വിദ്യാർഥിക്കെതിരെ കേസെടുത്ത് ജുവനൈൽ കോടതി ജഡ്ജിക്ക് റിപ്പോർട് കൈമാറി.
Most Read| സംസ്ഥാനത്ത് ഇന്ന് ഇടിമിന്നലോട് കൂടിയ മഴക്ക് സാധ്യത