തൃശൂര്‍: ലൈഫ് മിഷന് വിവാദവുമായി ബന്ധപ്പെട്ട് വടക്കാഞ്ചേരി നഗരസഭയില്‍ സിബിഐ റെയ്‌ഡ്‌ നടത്തി. രണ്ട് മണിക്കൂറോളം നീണ്ടു നിന്ന പരിശോധനയില്‍ വിവിധ രേഖകള്‍ മൂന്നംഗ സിബിഐ സംഘം പിടിച്ചെടുത്തു. ബില്‍ഡിങ് പെര്‍മിറ്റ് അടക്കമുള്ള രേഖകളാണ് പിടിച്ചെടുത്തത്. വൈദ്യുതിക്ക് അനുമതി നല്‍കിയത്, ഭൂമി ഇടപാടുകള്‍ എന്നിവയുമായി ബന്ധപ്പെട്ട രേഖകളും ഇതില്‍ ഉള്‍പ്പെടുന്നു.
പദ്ധതിയുടെ ഭാഗമായി നിര്‍മാണ പ്രവര്‍ത്തനങ്ങള്‍ നടന്നിരുന്ന സ്ഥലം സന്ദര്‍ശിക്കാനാണ് അടുത്ത നീക്കം. രേഖകളില്‍ വിശദമായ പരിശോധന നടത്തിയതിന് ശേഷം മാത്രമേ അടുത്ത നടപടികളിലേക്ക് നീങ്ങുകയുളളൂ.
അതേസമയം, വടക്കാഞ്ചേരിയിലെ ലൈഫ് മിഷന് പദ്ധതിയുടെ ഫ്‌ലാറ്റ് നിര്‍മാണം നിര്‍ത്തിവെച്ചു. നിര്‍മാണ പ്രവര്‍ത്തനങ്ങള്‍ നിര്‍ത്തി വെക്കണമെന്ന് ആവശ്യപ്പെട്ട് യൂണിടാക് ലൈഫ് മിഷന് കത്ത് നല്‍കി. യുഎഇ കോണ്‍സുലേറ്റുമായി ആശയവിനിമയം നടത്താന്‍ കഴിഞ്ഞ ആറ് മാസമായി സാധിച്ചിട്ടില്ല. അതിനാല്‍ നിര്‍മാണ പ്രവര്‍ത്തനങ്ങളില്‍ അനിശ്ചിതത്വം ഉണ്ടായി എന്ന് യൂണിടാക് കമ്പനി കത്തിലൂടെ വ്യക്തമാക്കി.
എന്നാല്‍, സിബിഐ കേസിന്റെ പശ്ചാത്തലത്തില്‍ നിര്‍മാണ പ്രവര്‍ത്തനങ്ങള്‍ നിര്‍ത്തി വെക്കാന്‍ കമ്പനി നിര്‍ദ്ദേശിച്ചതായാണ് തൊഴിലാളികള്‍ വ്യക്തമാക്കുന്നത്. വടക്കാഞ്ചേരിയിലെ ലൈഫ് മിഷന് ഫ്‌ലാറ്റ് നിര്‍മാണ പ്രവര്‍ത്തനങ്ങളില്‍ മുന്നൂറോളം തൊഴിലാളികളാണ് ഏര്‍പ്പെട്ടിരിക്കുന്നത്. സിബിഐയുടെ തുടര്‍നടപടികള്‍ വ്യക്തമായതിന് ശേഷം മാത്രമേ നിര്‍മാണ പ്രവര്‍ത്തനങ്ങള്‍ പുനരാരംഭിക്കുകയുള്ളൂ.
