തിരുവനന്തപുരം: കേരള- ലക്ഷദ്വീപ് തീരങ്ങളില് വ്യാഴാഴ്ച മുതല് തിങ്കളാഴ്ച (30-08-2021) വരെ ശക്തമായ കാറ്റിന് സാധ്യതയുള്ളതായി കാലാവസ്ഥാ വകുപ്പിന്റെ മുന്നറിയിപ്പ്. മണിക്കൂറില് 40 മുതല് 50 കിമീ വരെ വേഗതയില് വീശിയടിച്ചേക്കാവുന്ന കാറ്റിനാണ് സാധ്യത. ഈ സാഹചര്യത്തിൽ മൽസ്യതൊഴിലാളികള് കടലില് പോകരുതെന്ന് കാലാവസ്ഥാ വകുപ്പ് മുന്നറിയിപ്പ് നൽകി.
കാലാവസ്ഥാ വകുപ്പിന്റെ പ്രത്യേക ജാഗ്രതാ നിര്ദ്ദേശം:
26–08–2021(വ്യാഴം) മുതല് 30–08–2021(തിങ്കൾ) വരെ: തെക്ക്-പടിഞ്ഞാറന് മധ്യ-പടിഞ്ഞാറന് അറബിക്കടലില് മണിക്കൂറില് 40 മുതല് 50 കിമീ വരെയും ചില അവസരങ്ങളില് മണിക്കൂറില് 60 കിമീ വേഗതയിലും വീശിയടിച്ചേക്കാവുന്ന കനത്ത കാറ്റിന് സാധ്യത.
26–08–2021(വ്യാഴം) മുതല് 28–08–2021(ശനി) വരെ: ഗള്ഫ് ഓഫ് മാന്നാര്, കന്യാകുമാരി തീരം എന്നിവിടങ്ങളില് മണിക്കൂറില് 30 മുതല് 40 കിമീ വരെ വേഗതയില് വീശിയടിച്ചേക്കാവുന്ന ശക്തമായ കാറ്റിന് സാധ്യത
മേല് പറഞ്ഞ ദിവസങ്ങളില് പ്രസ്തുത പ്രദേശങ്ങളില് മൽസ്യ ബന്ധനത്തിന് പോകാന് പാടുള്ളതല്ലെന്ന് അധികൃതർ അറിയിച്ചു.
അതേസമയം ബംഗാൾ ഉൾക്കടലിൽ ആന്ധ്ര, ഒഡിഷ തീരത്തിനടുത്തായി നാളെയോടെ ചക്രവാത ചുഴി രൂപപ്പെടാൻ സാധ്യതയുണ്ടെന്നും അധികൃതർ അറിയിച്ചു. ഇതിന്റെ പശ്ചാത്തലത്തിൽ കേരളത്തിൽ അടുത്ത അഞ്ച് ദിവസം ശക്തമായ മഴയ്ക്ക് സാധ്യതയുണ്ടെന്ന് അധികൃതർ മുന്നറിയിപ്പ് നൽകിയിട്ടുണ്ട്.
Most Read: ‘ശക്തമായ നടപടിയുണ്ടാകും’; ആരോഗ്യ പ്രവര്ത്തകര്ക്ക് എതിരായ അതിക്രമങ്ങളിൽ മുഖ്യമന്ത്രി