ന്യൂഡെൽഹി: കോവിഡ് രണ്ടാം വ്യാപനം രൂക്ഷമാകുന്ന സാഹചര്യത്തിൽ കൊവാക്സിന്റെ ബൂസ്റ്റർ ഡോസ് പരീക്ഷണം ആരംഭിച്ചു. കോവിഡിനെതിരായ പ്രതിരോധം വർധിപ്പിക്കുക എന്ന ലക്ഷ്യത്തോടെ ഡെൽഹി ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലാണ് കൊവാക്സിന്റെ ബൂസ്റ്റർ ഡോസ് പരീക്ഷണം ആരംഭിച്ചത്.
6 മാസങ്ങൾക്ക് മുൻപ് കൊവാക്സിന്റെ രണ്ട് ഡോസും സ്വീകരിച്ച 190 പേരാണ് ക്ളിനിക്കൽ പരീക്ഷണ ഘട്ടത്തിൽ പങ്കെടുക്കുന്നത്. രാജ്യത്തെ 9 ഇടങ്ങളിലായി നടക്കുന്ന പരീക്ഷണത്തിന്റെ കാലാവധി 6 മാസമാണ്. ചെന്നൈയിൽ ഇതിനോടകം 7 പേർ കൊവാക്സിന്റെ ബൂസ്റ്റർ ഡോസ് സ്വീകരിച്ചിട്ടുണ്ട്.
കോവിഡിനെതിരായ പ്രതിരോധം വർധിപ്പിക്കാനായാണ് ബൂസ്റ്റർ ഡോസ് എടുക്കുന്നത്. ഈ ഡോസ് ഫലവത്താകുകയോ ആവാതിരിക്കുകയോ ചെയ്യാം. വിശദമായ പഠനത്തിന് ശേഷം ഇതുസംബന്ധിച്ച കൂടുതൽ വിവരങ്ങൾ പുറത്തുവിടാൻ സാധിക്കുമെന്ന് ഡെൽഹി എയിംസിൽ പരീക്ഷണത്തിന് നേതൃത്വം നൽകുന്ന ഡോ. സഞ്ജയ് റായ് അറിയിച്ചു. ബൂസ്റ്റർ ഡോസിന്റെ ദീർഘകാല പ്രതിരോധം, സുരക്ഷ, പ്രതികരണം എന്നിവ നിരീക്ഷിക്കാനാണ് ഈ പരീക്ഷണമെന്നും സഞ്ജയ് റായ് വ്യക്തമാക്കി.
Read also: വിമാനത്തിനുള്ളിൽ വിവാഹം; പങ്കെടുത്തത് 160 പേർ; മാനദണ്ഡങ്ങൾ കാറ്റിൽ പറത്തി ആഘോഷം