കാലിഫോര്‍ണിയ: ഫൈസര്‍ വാക്സിന് സ്വീകരിച്ച നഴ്സിന് കോവിഡ്. അമേരിക്കയിലെ കാലിഫോര്‍ണിയയില്‍ 45കാരിക്കാണ് കോവിഡ് സ്‌ഥിരീകരിച്ചത്. വാക്സിന് സ്വീകരിച്ച് ഒരാഴ്‌ച കഴിഞ്ഞ ശേഷമാണ് രോഗം സ്‌ഥിരീകരിച്ചത്. ഡിസംബര്‍ 18നാണ് ഇവര്‍ വാക്സിന് എടുത്തത്.
വാക്സിന് സ്വീകരിച്ച് കഴിഞ്ഞാല്‍ വൈറസില്‍ നിന്ന് സംരക്ഷണം ലഭിക്കാന്‍ 10 മുതല്‍ 14 ദിവസം വേണ്ടിവരുമെന്ന് സാന്‍ഡിയാഗോ കുടുംബാരോഗ്യ കേന്ദ്രത്തിലെ സ്‌പെഷ്യലിസ്‌റ്റായ ക്രിസ്‌ത്യന്‍ റാമേഴ്സ് പറഞ്ഞു. വാക്‌സിൻ സ്വീകരിക്കുന്ന സമയം തന്നെ വൈറസ് ബാധയേറ്റ മറ്റ് ആരോഗ്യ പ്രവർത്തകരുടെ കാര്യവും ശ്രദ്ധയിൽപ്പെട്ടിട്ടുണ്ടെന്ന് അദ്ദേഹം പറഞ്ഞു. ആദ്യ ഡോസ് 50 ശതമാനം മാത്രമേ ഫലപ്രദമാവുകയുള്ളൂ. രണ്ടാമത്തെ ഡോസ് എടുക്കുമ്പോഴത് 95 ശതമാനം ആകുമെന്നും റാമേഴ്സ് കൂട്ടിച്ചേർത്തു.
അമേരിക്കന്‍ ഫുഡ് ആന്‍ഡ് ഡ്രഗ് അഡ്മിനിസ്‌ട്രേഷന്‍ ഡിസംബര്‍ 11നാണ് ഫൈസര്‍ ബയോന്‍ടെക് കോവിഡ് വാക്‌സിന്റെ അടിയന്തര ഉപയോഗത്തിന് അനുമതി നല്‍കിയത്. അമേരിക്കന്‍ മരുന്ന് കമ്പനിയായ ഫൈസര്‍ ജര്‍മന്‍ കമ്പനിയായ ബയോന്‍ടെക്കിനൊപ്പം ചേര്‍ന്നാണ് വാക്സിന് വികസിപ്പിച്ചത്.
Read also: ഓക്‌സ്‌ഫോർഡ് കോവിഡ് വാക്സിന് ബ്രിട്ടനിൽ അംഗീകാരം
