തിരുവനന്തപുരം: തിരുവനന്തപുരത്തെ ശ്‌മശാനങ്ങളില്‍ ശവ സംസ്‌കാരത്തിനുള്ള സംവിധാനം അപര്യാപ്‌തമായതിനെ തുടര്‍ന്ന് താല്‍ക്കാലിക സംവിധാനങ്ങള്‍ ഏര്‍പ്പെടുത്തണമെന്ന് മനുഷ്യാവകാശ കമ്മീഷന്‍. ജില്ലാ കളക്‌ടർ അടിയന്തിരമായി അന്വേഷണം നടത്തി റിപ്പോര്‍ട് ഹാജരാക്കണമെന്നും സംസ്‌ഥാന മനുഷ്യാവകാശ കമ്മീഷന്‍ ആവശ്യപ്പെട്ടു.
പത്രവാര്‍ത്തയുടെ അടിസ്‌ഥാനത്തില്‍ കമ്മീഷന്‍ അധ്യക്ഷന്‍ ജസ്‌റ്റിസ് ആന്റണി ഡൊമിനിക് സ്വമേധയാ രജിസ്‌റ്റര്‍ ചെയ്‌ത കേസിലാണ് നടപടി. തിരുവനന്തപുരത്തെ തൈക്കാട് ശ്‌മശാനത്തില്‍ ശവ സംസ്‌കാരത്തിന് സമയം ബുക്ക് ചെയ്‌ത്‌ ദിവസങ്ങള്‍ കാത്തിരിക്കേണ്ട അവസ്‌ഥയാണെന്ന് പരാതിയുണ്ടായിരുന്നു.
കഴിഞ്ഞ ഒരാഴ്‌ചയായി പ്രതിദിനം 20 ഓളം കോവിഡ് ബാധിതരുടെ മൃതദേഹങ്ങളാണ് തൈക്കാട് ശ്‌മശാനത്തില്‍ സംസ്‌കരിക്കുന്നത്. 24 മൃതദേഹങ്ങളാണ് നാലു ഫര്‍ണസുകളിലായി സംസ്‌കരിക്കാന്‍ കഴിയുന്നത്. തുടര്‍ച്ചയായ ഉപയോഗം കാരണം യന്ത്രങ്ങള്‍ മന്ദഗതിയിലായെന്നാണ് റിപ്പോര്‍ട്. തിരുവനന്തപുരം നഗരസഭക്ക് തൈക്കാട് മാത്രമാണ് ശ്‌മശാനമുള്ളത്. മറ്റുള്ളവ സമുദായ സംഘടനകളുടെ ശ്‌മശാനങ്ങളാണ്.
Also Read: സംസ്‌ഥാനത്ത് യാത്രക്കാർ കുറഞ്ഞു; 12 ട്രെയിനുകളും 3 മെമുവും സർവീസ് നിർത്തിവച്ചു
