മലപ്പുറം: ഗാസയിൽ ഇസ്രയേൽ നടത്തുന്ന ക്രൂരമായ വ്യോമാക്രമണത്തിൽ പ്രയാസപ്പെടുന്ന പലസ്തീനികൾക്ക് ഐക്യദാർഢ്യം പ്രകടിപ്പിക്കാൻ ഇന്നത്തെ പെരുന്നാൾ ദിനം ഉപയോഗിക്കണമെന്ന് എസ്വൈഎസ് മലപ്പുറം ഈസ്റ്റ് ജില്ലാകമ്മിറ്റി ആവശ്യപ്പെട്ടു.
റമസാനിലെ അവസാന വെള്ളിയാഴ്ച അൽ അഖ്സ മസ്ജിദിൽ പ്രാർഥനക്കെത്തിയ നിരപരാധികളായ പലസ്തീനി ജനതക്ക് നേരെ മനുഷ്യത്വരഹിതമായ ആക്രമണമാണ് ഇസ്രയേൽ അഴിച്ചുവിട്ടത്. അതിനുശേഷം തുടർച്ചയായ രണ്ടാം ദിവസവും ഗാസ മുനമ്പിൽ ലോക മനസാക്ഷിയെ ഞെട്ടിക്കുന്ന വ്യോമാക്രമണത്തിൽ കുട്ടികളും സ്ത്രീകളുമുൾപ്പടെ നിരവധിയാളുകളാണ് കൊല്ലപ്പെട്ടത്.
ഇസ്രയേലിന്റെ പൈശാചികതയിൽ പ്രതിഷേധിക്കുന്നതോടൊപ്പം പലസ്തീനി ജനതയുടെ സമാധാനത്തിനായി പ്രാർഥിക്കാൻ കൂടി പെരുന്നാൾ ദിനത്തിൽ നാം തയ്യാറാകണം; എസ്വൈഎസ് നേതാക്കൾ ആവശ്യപ്പെട്ടു. കോവിഡ് പാശ്ചാത്തലത്തിൽ എല്ലാ വിശ്വാസികളും പെരുന്നാൾ ആഘോഷം അവരവരുടെ വീടുകളിൽ തന്നെ ഒതുക്കണമെന്നും ഒരു കാരണവശാലും പുറത്തിറങ്ങരുതെന്നും കോവിഡ് പ്രോട്ടോകോൾ എല്ലാവരും പാലിക്കണമെന്നും ഇവർ അഭ്യർഥിച്ചു.
കുടുംബ ബന്ധം പുതുക്കാനും സൗഹൃദ സന്ദേശം കൈമാറാനും നവമാദ്ധ്യമങ്ങൾ ഉപയോഗപ്പെടുത്താൻ നേതാക്കൾ ആവശ്യപ്പെട്ടു. ഈദ് ദിനത്തിൽ എസ്വൈഎസ് സംസ്ഥാന കമ്മിറ്റി മീഡിയാ മിഷൻ ചാനലിൽ സംഘടിപ്പിക്കുന്ന പരിപാടികൾ വിജയിപ്പിക്കനും ജില്ലാ കാബിനറ്റ് തീരുമാനിച്ചു.
യോഗത്തിൽ ജില്ലാ പ്രസിഡണ്ട് സികെ ഹസൈനാർ സഖാഫി അധ്യക്ഷത വഹിച്ചു. വിപിഎം ഇസ്ഹാഖ്, അബ്ദുറഹീം കരുവള്ളി, സയ്യിദ് ശിഹാബുദ്ദീൻ അഹ്സനി, മുഈനുദ്ദീൻ സഖാഫി വെട്ടത്തൂർ, സയ്യിദ് മുർതള ശിഹാബ് സഖാഫി, സികെ ശക്കീർ അരിമ്പ്ര, സിദീഖ് സഖാഫി വഴിക്കടവ്, പിപി മുജീബ് റഹ്മാൻ വടക്കേമണ്ണ, യൂസുഫ് സഅദി പൂങ്ങോട്, പികെ മുഹമ്മദ് ശാഫി തുടങ്ങിയവർ പങ്കെടുത്തു.
Most Read: കുംഭമേളയിൽ പങ്കെടുത്ത ബന്ധുവുമായി സമ്പർക്കം; ഡോക്ടർ ഉൾപ്പടെ 13 പേർക്ക് കോവിഡ്