ന്യൂഡെല്ഹി: റിപ്പബ്ളിക് ടിവിക്കും ടൈംസ് നൗവിനുമെതിരെ ഡെല്ഹി ഹൈക്കോടതി നോട്ടീസയച്ചു. സിനിമാ വ്യവസായത്തിനെതിരെ നിരുത്തരവാദപരവും അവഹേളനപരവുമായ പരാമര്ശങ്ങള് നടത്തുന്നതില് നിന്നും സിനിമാ താരങ്ങള്ക്കെതിരായ മാദ്ധ്യമ വിചാരണ നടത്തുന്നതില് നിന്നും തടയണമെന്ന് ആവശ്യപ്പെട്ട് ബോളിവുഡ് സംവിധായകരും നിര്മാതാക്കളും സമര്പ്പിച്ച ഹരജിയിലാണ് ഹൈക്കോടതി നോട്ടീസയച്ചത്.
സമൂഹ മാദ്ധ്യമങ്ങളിലോ ടിവിയിലോ ഇത്തരത്തിലുള്ള ഉള്ളടക്കം നല്കുന്നില്ലെന്നു ഉറപ്പുവരുത്തണമെന്ന് കോടതി ആവശ്യപ്പെട്ടു. മാദ്ധ്യമങ്ങളില് നിന്നും നിഷ്പക്ഷത പ്രതീക്ഷിക്കുന്നതായും കോടതി വ്യക്തമാക്കി. റിപബ്ളിക് ടിവിയുടെ അര്ണബ് ഗോസ്വാമി, പ്രദീപ് ഭണ്ഡാരി, ടൈംസ് നൗവിന്റെ രാഹുല് ശിവ്ശങ്കര്, നവിക കുമാര് എന്നിവര്ക്കെതിരെയാണ് കേസ്.
നാല് സിനിമ വ്യവസായ അസോസിയേഷനുകളും 34 പ്രൊഡ്യൂസര്മാരും ചേര്ന്നാണ് ഹരജി നല്കിയത്. കരണ് ജോഹര്, യഷ് രാജ്, ആമിര് ഖാന്, ഷാറൂഖ് ഖാന്, സല്മാന് ഖാന് എന്നിവരുടേത് അടക്കമുള്ള നിര്മാണ കമ്പനികള് കേസില് ഭാഗമായിരുന്നു. സുശാന്ത് സിംഗ് രജ്പുത്തിന്റെ മരണത്തെ തുടര്ന്ന് ബോളിവുഡ് മുഴുവന് മയക്കുമരുന്നിന് അടിമകളാണെന്നും നിന്ദ്യരാണെന്നുമൊക്കെ നടത്തിയ പരാമര്ശങ്ങളെ തുടര്ന്നാണ് നടപടി.
Read also: അമേരിക്കയില് സംഭവിച്ചത് ഇന്ത്യയിലും ആവര്ത്തിക്കും; മെഹ്ബൂബ മുഫ്തി