ന്യൂഡല്ഹി: വാഹനങ്ങളുമായി ബന്ധപ്പെട്ട എല്ലാ രേഖകളുടെയും കാലാവധി ഡിസംബര് 31 വരെ നീട്ടി. രജിസ്ട്രേഷന്, ഡ്രൈവിങ് ലൈസന്സ്, ഫിറ്റ്നസ്, പെര്മിറ്റ് തുടങ്ങിയ എല്ലാ രേഖകളുടെയും കാലാവധി നീട്ടി ഗതാഗതമന്ത്രാലയം ഉത്തരവിറക്കി. ഫെബ്രുവരി ഒന്നിന് സാധുത അവസാനിച്ച എല്ലാ രേഖകളും ഡിസംബര് 31 വരെ സാധുവായി കണക്കാക്കും.
1989ലെ മോട്ടോര്വാഹന ചട്ടത്തില് പറയുന്ന എല്ലാ രേഖകള്ക്കും ഇത് ബാധകമാണ്. രാജ്യത്തെ നിലവിലെ കോവിഡ് സ്ഥിതിഗതികള് കണക്കിലെടുത്താണ് ഗതാഗത മന്ത്രാലയത്തിന്റെ നടപടി. നേരത്തെ ഫെബ്രുവരി മുതല് കാലാവധി അവസാനിക്കുന്ന വാഹനങ്ങളുടെ രേഖകള് പുതുക്കുന്നതിന് സെപ്റ്റംബര് 30 വരെ സമയം അനുവദിച്ചിരുന്നു. മാര്ച്ച് 30നാണ് ഇത് സംബന്ധിച്ച് ഉത്തരവിറക്കിയത്. എന്നാല്, വൈറസ് വ്യാപനം തുടരുന്ന സാഹചര്യത്തില് വാഹന മേഖലയിലെ കടുത്ത പ്രതിസന്ധി പരിഗണിച്ച് രേഖകള് പുതുക്കുന്നതിനുള്ള സമയം വീണ്ടും നീട്ടുകയായിരുന്നു.