ഡെറാഡൂൺ: വിവാദ കാർഷിക നിയമങ്ങൾക്കെതിരെ പ്രതിഷേധിക്കുന്ന കർഷകർ പോലീസുമായി ഏറ്റുമുട്ടി. ഉത്തരാഖണ്ഡിലെ ഉദം സിംഗ് നഗർ ജില്ലയിലാണ് സംഘർഷം ഉണ്ടായത്. പോലീസ് തടയാൻ ശ്രമിക്കുന്നതിനിടെ പ്രകടനക്കാർ ബാരിക്കേഡിന് നേരെ ട്രാക്‌ടർ ഓടിച്ച് കയറ്റുന്നതിന്റെ ദൃശ്യങ്ങൾ വാർത്താ ഏജൻസിയായ എഎൻഐ പുറത്തുവിട്ടു.
കർഷകർ ഡെൽഹിയിലെ സമരമുഖത്തേക്ക് പോകുന്നത് പോലീസ് തടഞ്ഞതാണ് സംഘർഷത്തിന് കാരണം. വഴി തടയാൻ പോലീസ് ഉപയോഗിച്ച ബാരിക്കേഡുകൾക്ക് നേരെ കുറച്ച് പ്രതിഷേധകർ ട്രാക്‌ടർ ഓടിച്ച് കയറ്റുകയും വഴിയിൽ നിന്ന് മാറാൻ പോലീസിനെ നിർബന്ധിക്കുകയും ചെയ്യുന്ന ദൃശ്യങ്ങൾ അടങ്ങിയ വീഡിയോ എഎൻഐ ട്വിറ്ററിൽ പോസ്‌റ്റ് ചെയ്‌തു.
#WATCH | Protesters agitating against the new farm laws run a tractor over a police barricade in Bajpur, of the Udham Singh Nagar district in Uttarakhand pic.twitter.com/aI97qNcg0U
— ANI (@ANI) December 25, 2020
അതേസമയം, തലസ്‌ഥാനത്ത് തുടങ്ങിയ കര്‍ഷക പ്രക്ഷോഭം ഒരുമാസം പിന്നിടുകയാണ്. ഡെൽഹിയിലേക്കുള്ള അതിർത്തികളിൽ വിവിധ സംസ്‌ഥാനങ്ങളിലെ പതിനായിരക്കണക്കിന് കർഷകർ തമ്പടിച്ചിട്ടുണ്ട്. അതിശൈത്യത്തിലും തുടരുന്ന സമരത്തില്‍ 30ലേറെ കര്‍ഷകര്‍ക്ക് ജീവന്‍ നഷ്‌ടപ്പെട്ടിട്ടുണ്ട്. പ്രക്ഷോഭകരെ അനുനയിപ്പിക്കാന്‍ കേന്ദ്രം ചര്‍ച്ചയുമായി രംഗത്തെത്തിയെങ്കിലും നിയമം പിന്‍വലിക്കും വരെ വിട്ടുവീഴ്‌ചയില്ലെന്നും ഭേദഗതി വേണ്ടെന്നുമുള്ള നിലപാടില്‍ കര്‍ഷകര്‍ ഉറച്ചുനില്‍ക്കുകയാണ്.
Also Read: കാർഷിക നിയമങ്ങൾക്ക് പിന്തുണയില്ല; മക്കൾ നീതി മയ്യം വൈസ് പ്രസിഡണ്ട് പാർട്ടി വിട്ടു
