അഗർത്തല: ത്രിപുരയിൽ പ്രതിഷേധക്കാർക്ക് നേരെ പോലീസ് വെടിവെപ്പ്, ഒരാൾ മരിച്ചു. 45കാരനായ ശ്രീകണ്‌ഠ ദാസ് ആണ് കൊല്ലപ്പെട്ടത്. നിരവധി പേർക്ക് പരിക്കേറ്റു, ഇതിൽ 5 പേരുടെ നില ഗുരുതരമാണ്. ബ്രു അഭയാർഥികളുടെ പുനരധിവാസത്തിന് എതിരെ നടത്തുന്ന അനിശ്‌ചിതകാല ബന്ദിനെ പിന്തുണച്ച് നടത്തിയ പ്രതിഷേധം അക്രമാസക്‌തമായതോടെ ആണ് പോലീസ് വെടിവെച്ചത്.
പ്രതിഷേധക്കാർ പനിസാഗർ ടൗണിലെ ദേശീയപാത തടയുകയും പോലീസിന് നേരെ കല്ലെറിയുകയും ചെയ്‌തതോടെയാണ് വെടിവെപ്പുണ്ടായതെന്നാണ് അധികൃതരുടെ വിശദീകരണം. അഗ്‌നിശമന സേനാ വിഭാഗത്തിലെ ജീവനക്കാരൻ മരിച്ചതായും റിപ്പോർട്ട് ഉണ്ട്, എന്നാൽ പോലീസ് ഇതുവരെ മരണം സ്‌ഥിരീകരിച്ചിട്ടില്ല.
അക്രമസാധ്യത നില നിൽക്കുന്നതിനാൽ നഗരത്തിൽ പോലീസിനെ വിന്യസിച്ചിരിക്കുകയാണ്. മിസോറാമിൽ നിന്നുള്ള 35,000 ആദിവാസി ബ്രു അഭയാർഥികളെ പുനരധിവസിപ്പിക്കാൻ കേന്ദ്രസർക്കാർ തീരുമാനിച്ചതിന് പിന്നാലെയാണ് ഇവിടെ പ്രതിഷേധം ആരംഭിച്ചത്.
Also Read: പഞ്ചാബിൽ ട്രെയിൻ തടയില്ല; പരിഹാരമില്ലെങ്കിൽ സമരം വീണ്ടും തുടങ്ങും; കർഷകർ
