കൊച്ചി: സംസ്‌ഥാനത്ത് സ്വർണ വില വീണ്ടും ഇടിഞ്ഞു. ബുധനാഴ്‌ച പവന് 240 രൂപ കുറഞ്ഞ് 35,320 രൂപയിലെത്തി. ഗ്രാമിന് 30 രൂപ കുറഞ്ഞ് 4,415 രൂപയായി. കഴിഞ്ഞ ദിവസം പവന് 120 രൂപ കുറഞ്ഞ് 35,560 രൂപയായിരുന്നു സ്വർണത്തിന്റെ വില.
ആഗോള വിപണിയിലും വിലയിടിഞ്ഞു. സ്‌പോട് ഗോൾഡ് വില ഔൺസിന് 1,767.76 ഡോളറായാണ് കുറഞ്ഞത്. യുഎസ് ട്രഷറി ആദായം 1.6 ശതമാനമായി വർധിച്ചതും ഡോളർ സൂചിക കരുത്തു കാട്ടിയതുമാണ് സ്വർണ വിലയിൽ പ്രതിഫലിച്ചത്.
അഞ്ചാം ദിവസമാണ് ദേശീയ വിപണിയിൽ വില കുറയുന്നത്. കമ്മോഡിറ്റി വിപണിയായ എംസിഎക്‌സിൽ 10 ഗ്രാം തനിത്തങ്കത്തിന്റെ വില 0.32 ശതമാനം കുറഞ്ഞ് 47,151 രൂപയിലെത്തി. കഴിഞ്ഞയാഴ്‌ചയിൽ, രണ്ടു മാസത്തെ ഉയർന്ന നിലവാരമായ 48,400 രൂപയിൽ എത്തിയ ശേഷം തുടർച്ചയായി വിലയിടിയുന്ന പ്രവണതയാണ് കാണുന്നത്.
Also Read: ചരിത്രനേട്ടവുമായി കെഎംഎംഎൽ; കഴിഞ്ഞ വർഷം നേടിയത് 112 കോടിയുടെ ലാഭം
