കൊച്ചി: ഗുരുവായൂര് ദേവസ്വം ഫണ്ട് മുഖ്യമന്ത്രിയുടെ ദുരിതാശ്വാസ നിധിയിലേക്കോ മറ്റേതെങ്കിലും സര്ക്കാര് ഏജന്സികള്ക്കോ സംഭാവന നല്കുന്നതിനായി വിനിയോഗിക്കാന് സാധിക്കില്ലെന്ന് ഹൈക്കോടതി.
ദേവസ്വം ഫണ്ടില് നിന്ന് 5 കോടി രൂപ ദുരിതാശ്വാസ നിധിയിലേക്കു നല്കുന്നതു ചോദ്യം ചെയ്തുള്ള ഹരജികളാണു ജസ്റ്റിസ് എ ഹരിപ്രസാദ്, ജസ്റ്റിസ് അനു ശിവരാമന്, ജസ്റ്റിസ് എംആര് അനിത എന്നിവരുള്പ്പെട്ട ഫുള്ബെഞ്ച് പരിഗണിച്ചത്. പ്രളയ ദുരിതാശ്വാസത്തിന് 5 കോടി കൈമാറിയത് ശരിവച്ച ഡിവിഷന് ബെഞ്ചിന്റെ നടപടി നിലനില്ക്കില്ലെന്നും കോടതി വ്യക്തമാക്കി.
ദേവസ്വം നിയമത്തിന്റെ ചട്ടക്കൂട്ടില് നിന്നു പ്രവര്ത്തിക്കണം. ഫണ്ടില് നിന്നു തുക കൈമാറാന് നിയമം അനുവദിക്കുന്നില്ല. ഭക്തരുടെ ആരോഗ്യ ആവശ്യങ്ങള്ക്കും ജലവിതരണ, ശുചീകരണ നടപടികള്ക്കുമായി പണം ചെലവിടാന് നിയമത്തില് വ്യവസ്ഥയുണ്ടെങ്കിലും നിയമപ്രകാരമുള്ള ചുമതലകള് നേരിട്ടോ, നേരിട്ടുള്ള നിയന്ത്രണത്തിലോ ചെയ്യാമെന്നല്ലാതെ ആര്ക്കെങ്കിലും കൈമാറാനാവില്ലെന്നു കോടതി വ്യക്തമാക്കി.
ഹിന്ദു ഐക്യവേദി ജനറല് സെക്രട്ടറി ആര്വി ബാബു, ഗുരുവായൂര് ദേവസ്വം എംപ്ളോയീസ് യൂണിയന് കോണ്ഗ്രസ് നേതാവ് ബി മോഹന്കുമാര്, ബിജെപി സംസ്ഥാന സെക്രട്ടറി എ നാഗേഷ് തുടങ്ങിയവരുടെ ഉള്പ്പെടെ ഒരുകൂട്ടം ഹരജികളാണു കോടതി പരിഗണിച്ചത്.
Read also: കെഎസ്ആര്ടിസി എല്ലാ സര്വീസുകളും ആരംഭിച്ചില്ല; അധികമായി ഓടിയത് 100 സര്വീസുകള് മാത്രം