തിരുവനന്തപുരം: പാർട്ടിയുടെ തീരുമാനങ്ങൾക്ക് വിരുദ്ധമായി ഗ്രൂപ്പ് യോഗം ചേർന്ന 7 പേര്‍ക്ക് കെപിസിസിയുടെ കാരണം കാണിക്കല്‍ നോട്ടീസ്. ബ്‌ളോക്ക് സെക്രട്ടറിയുടെ വീട്ടിൽ ചേർന്ന ഗ്രൂപ്പ് യോഗത്തിന് നോട്ടീസ് നൽകിയ ഡിസിസി ജനറല്‍ സെക്രട്ടറിമാർക്കാണ് നോട്ടീസ് നൽകിയിരിക്കുന്നത്.
ഡിസിസി ജനറല്‍ സെക്രട്ടറിമാരായ എംആര്‍ ബൈജു, സുബ്രഹ്‌മണ്യന്‍ എന്നിവര്‍ക്കും യോഗത്തില്‍ പങ്കെടുത്ത പള്ളിച്ചല്‍ ഗ്രാമപഞ്ചായത്ത് മെമ്പർ പള്ളിച്ചല്‍ സതീശ്, ബ്‌ളോക്ക് സെക്രട്ടറിമാരായ പുന്നമൂട് ശിവകുമാര്‍, ഗോപകുമാര്‍, കണ്ടല അബുബക്കര്‍, മഹിളാ കോണ്‍ഗ്രസ് ജില്ലാ കമ്മിറ്റിയംഗം മല്ലികാദാസ് എന്നിവര്‍ക്കാണ് കാരണം കാണിക്കൽ നോട്ടീസ് നൽകിയത്.
കെപിസിസി ജനറൽ സെക്രട്ടറി ടിയു രാധാകൃഷ്‌ണന്റേതാണ് നടപടി. ഒരാഴ്‌ചയ്‌ക്കകം വിശദീകരണം നൽകണമെന്നും അല്ലെങ്കിൽ തുടർനടപടികളിലേക്ക് കടക്കുമെന്നും നോട്ടീസിൽ വ്യക്‌തമാക്കിയിട്ടുണ്ട്. ഈ മാസം 21നാണ് മൂക്കുന്നി മലയില്‍ ബ്‌ളോക്ക് സെക്രട്ടറി ഗോപകുമാറിന്റെ വീട്ടിൽ നേതാക്കൾ ഗ്രൂപ്പ് യോഗം ചേർന്നത്.
Also Read: ആർസിസിയിലെ രക്‌ത കോശങ്ങളുടെ വിലവർധന; കേസെടുത്ത് മനുഷ്യാവകാശ കമ്മീഷൻ
