കൊച്ചി: മാസ്ക് വെക്കാൻ നിർദ്ദേശിച്ചതിന് എഎസ്ഐയെ മർദ്ദിച്ച സംഭവത്തിൽ യുവാവ് അറസ്റ്റിൽ. പാലക്കാട് സ്വദേശി സുഹൈലാണ് പിടിയിലായത്.
ഇന്നലെ വൈകിട്ട് 4.30ഓടെ ആയിരുന്നു സംഭവം. വൈറ്റില മൊബിലിറ്റി ഹബ്ബിൽ നിൽക്കുകയായിരുന്ന സുഹൈലിനോട് മരട് എഎസ്ഐ കെപി സത്യനാണ് മാസ്ക് വെക്കണമെന്ന് നിർദ്ദേശിച്ചത്. പിന്നാലെ ഇയാൾ എഎസ്ഐയെ മർദ്ദിക്കുകയായിരുന്നു.
മാസ്ക് വെക്കാത്തത് എന്ത് കൊണ്ടായിരുന്നു എന്ന് ചോദിച്ച എഎസ്ഐയ്ക്ക് നേരെ പ്രതി സുഹൈൽ പ്രകോപനപരമായി അടുക്കുകയായിരുന്നു. എഎസ്ഐയുടെ മുഖത്തേറ്റ മർദ്ദനത്തിൽ കണ്ണട ഒടിഞ്ഞ് കണ്ണിൽ കയറി. സംഭവശേഷം പ്രതി രക്ഷപ്പെടാൻ ശ്രമിച്ചെങ്കിലും നാട്ടുകാർ പിടികൂടി പോലീസിനെ ഏൽപ്പിക്കുകയായിരുന്നു. കൊച്ചിയിൽ കൂളർ കമ്പനിയിൽ ജോലി ചെയ്ത് വരികയായിരുന്നു പ്രതി.
അതേസമയം മർദ്ദനമേറ്റ എഎസ്ഐ കെപി സത്യനെ സ്വകാര്യ ആശുപത്രിയിൽ പ്രവേശിപ്പിച്ച് ചികിൽസ നൽകി വിട്ടയച്ചു.
Malabar News: കോഴിക്കോട് പേരാമ്പ്രയിൽ മാവോയിസ്റ്റ് ഭീഷണി; ആശങ്കയിൽ നാട്ടുകാർ