ചണ്ഡീഗഢ്: ഇന്ത്യയുടെ ഇതിഹാസ അത്‍ലറ്റ് മില്‍ഖാ സിംഗിന്റെ ആരോഗ്യനില ഗുരുതരാവസ്‌ഥയില്‍. ശരീരത്തില്‍ ഓക്‌സിജന്റെ അളവ് വീണ്ടും കുറഞ്ഞതോടെ ആരോഗ്യനില വഷളാവുകയും ആശുപത്രിയിൽ പ്രവേശിപ്പിക്കുകയും ആയിരുന്നു. ചണ്ഡീഗഢിലെ പിജിമെര്‍ ആശുപത്രിയിലാണ് മില്‍ഖ സിംഗിനെ പ്രവേശിപ്പിച്ചത്.
നേരത്തെ കോവിഡ് ബാധിച്ച്‌ രോഗമുക്‌തി നേടിയിരുന്നെങ്കിലും ഡിസ്ച്ചാര്‍ജ് ആയതിന് ശേഷം ശരീരത്തിലെ ഓക്‌സിജന്റെ അളവ് കുറഞ്ഞതിനെ തുടര്‍ന്ന് ഇദ്ദേഹത്തെ വീണ്ടും ഐസിയുവില്‍ പ്രവേശിപ്പിച്ചിരുന്നു. പിന്നീട് ആരോഗ്യം വീണ്ടെടുത്ത മില്‍ഖ സിംഗ് ചണ്ഡീഗഢിലെ വീട്ടില്‍ ഐസൊലേഷനില്‍ കഴിയുകയായിരുന്നു. എന്നാല്‍, ശ്വാസതടസം കലശലായതോടെയാണ് വീണ്ടും ആശുപത്രിയില്‍ പ്രവേശിപ്പിച്ചത്.
ജൂണ്‍ 14ന് മില്‍ഖാ സിംഗിന്റെ ഭാര്യയും ഇന്ത്യന്‍ വോളിബോള്‍ ടീമിന്റെ മുന്‍ ക്യാപ്റ്റനുമായിരുന്ന നിര്‍മല്‍ കൗര്‍ കോവിഡ് ബാധിച്ച്‌ മരണപ്പെട്ടിരുന്നു. മൊഹാലിയിലെ ആശുപത്രിയില്‍ ചികിൽസയിലിരിക്കെ ആയിരുന്നു മരണം. അതേസമയം പ്രത്യേക മെഡിക്കല്‍ സംഘത്തിന്റെ നേതൃത്വത്തിലാണ് മില്‍ഖാ സിംഗിന്റെ ചികിൽസ പുരോഗമിക്കുന്നത്.
Most Read: ജാഗ്രത കൈവിടരുത്; മൂന്നാം തരംഗത്തില്‍ കൂടുതല്‍ വ്യാപനശേഷിയുള്ള വൈറസ് സാധ്യതയെന്ന് മുഖ്യമന്ത്രി
