തിരുവനന്തപുരം: മുന്നറിയിപ്പില്ലാതെ തിരുവനന്തപുരം ജനറല് ആശുപത്രി സന്ദര്ശിച്ച് ആരോഗ്യവകുപ്പ് മന്ത്രി വീണ ജോർജ്. അടഞ്ഞുകിടക്കുന്ന സ്ട്രോക്ക് യൂണിറ്റ് എത്രയും വേഗം പ്രവര്ത്തന സജ്ജമാക്കാന് മന്ത്രി നിർദ്ദേശം നൽകി. സ്ട്രോക്ക് ചികിൽസക്ക് ആശുപത്രിയിലെത്തുന്നവര്ക്ക് പരിചരണം ഉറപ്പാക്കണം. അത്യാഹിത വിഭാഗം, വെയിറ്റിംഗ് ഏരിയ, ഫാര്മസി, കോവിഡ് വാര്ഡ്, ഓപ്പറേഷന് തിയേറ്റർ കോംപ്ളക്സ്, വിവിധ ഐസിയുകള്, കാത്ത് ലാബ് എന്നിവ മന്ത്രി സന്ദര്ശിച്ചു. കൂടാതെ രോഗികളുമായും ജീവനക്കാരുമായും മന്ത്രി ആശയവിനിമയം നടത്തുകയും ചെയ്തു.
ആശുപത്രി സൗകര്യം, സേവനം, ചികിൽസ എന്നിവ ഉറപ്പാക്കാനാണ് ആശുപത്രി സന്ദര്ശനം നടത്തുന്നതെന്ന് മന്ത്രി പറഞ്ഞു. തിരുവനന്തപുരത്തെ പ്രധാന ആശുപത്രിയായ ജനറല് ആശുപത്രിയില് ധാരാളമാളുകള് എത്തുന്നുണ്ട്. അവര്ക്ക് വിദഗ്ധ പരിചരണം ഉറപ്പാക്കണം. ഒപിയില് തിരക്ക് ഒഴിവാക്കുന്നതിനായി ഒപി കൗണ്ടറുകളും ചില ഒപി പരിശോധനാ മുറികളും രോഗികള്ക്ക് സൗകര്യപ്രദമായവിധം പുനഃക്രമീകരിക്കാന് നിര്ദ്ദേശം നല്കിയതായും മന്ത്രി അറിയിച്ചു.
ജനറല് ആശുപത്രിയിലെ മുന്വശത്തുള്ള പാസ് കൗണ്ടറിലാണ് മന്ത്രി ആദ്യമെത്തിയത്. സ്ത്രീകള്ക്കും പുരുഷന്മാര്ക്കും രണ്ട് കൗണ്ടറുകളുള്ളതായി ബോര്ഡുണ്ടെങ്കിലും ഒരു കൗണ്ടര് മാത്രമേ പ്രവര്ത്തിക്കാറൂള്ളൂ എന്ന് ക്യൂവില് നിന്ന ഒരാള് പരാതി പറഞ്ഞു. ഉടന് തന്നെ മന്ത്രി കൗണ്ടറില് കയറി കാര്യമന്വേഷിച്ചു. അവിടെയുണ്ടായിരുന്ന ജീവനക്കാരി പറഞ്ഞത് കമ്പ്യൂട്ടര് കേടായെന്നും 11 മാസമായി പ്രവര്ത്തിക്കുന്നില്ലെന്നുമാണ്. എന്നാൽ ആശുപത്രി സൂപ്രണ്ടിനെ വിളിച്ചുവരുത്തിയപ്പോൾ കമ്പ്യൂട്ടര് പ്രവര്ത്തിക്കുന്നുണ്ടെന്ന് മനസിലായി. ഇതോടെ തെറ്റിദ്ധരിപ്പിച്ച ജീവനക്കാരിക്കെതിരെ നടപടി സ്വീകരിക്കാനും എത്രയും വേഗം കൗണ്ടര് പുനഃസ്ഥാപിക്കാനും മന്ത്രി നിര്ദ്ദേശം നല്കി.
സ്റ്റാഫ് നഴ്സുമാരായി ജോലി ചെയ്തിട്ടും എക്സ്പീരിയന്സ് സര്ട്ടിഫിക്കറ്റ് നല്കുന്നില്ലെന്ന് ചിലര് പരാതിപ്പെട്ടു. തടസങ്ങള് നീക്കി അവര്ക്ക് എക്സ്പീരിയന്സ് സര്ട്ടിഫിക്കറ്റ് നല്കാന് മന്ത്രി നിര്ദ്ദേശം നല്കി. ആരോഗ്യ വകുപ്പ് ഡയറക്ടർ വിആര് രാജു മന്ത്രിയോടൊപ്പം ആശുപത്രി സന്ദർശനത്തിന് ഉണ്ടായിരുന്നു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
