ചെന്നൈ: കനത്ത മഴ തുടരുന്ന സാഹചര്യത്തിൽ തമിഴ്‌നാട്ടിലെ 7 ജില്ലകളിൽ നാളെ റെഡ് അലർട് പ്രഖ്യാപിച്ചു. തൂത്തുക്കുടി, തിരുനെൽവേലി, പുതുക്കോട്ട, വിരുദുനഗർ, രാമനാഥപുരം, തിരുവാരൂർ, തെങ്കാശി എന്നീ ജില്ലകളിലാണ് നാളെ റെഡ് അലർട് പ്രഖ്യാപിച്ചത്. നിലവിൽ തിരുനെൽവേലി, കന്യാകുമാരി, തൂത്തുക്കുടി, തിരുച്ചന്തൂർ ജില്ലകളിൽ ശക്‌തമായ മഴ തുടരുകയാണ്.
ഇന്ന് രാവിലെ എട്ടരമുതൽ ഉച്ചയ്‌ക്ക്‌ ഒരു മണിവരെയുള്ള കണക്കുകൾ പ്രകാരം തിരുച്ചന്തൂരിൽ 152.5 മില്ലീമീറ്ററും തൂത്തുക്കുടിയിൽ 59 മില്ലി മീറ്ററും മഴ രേഖപ്പെടുത്തി. അതേസമയം ചെന്നൈ ഉൾപ്പടെയുള്ള 14 ജില്ലകളിൽ മിതമായ അളവിൽ മഴ ലഭിക്കുകയും ചെയ്‌തു.
എന്നാൽ നാളെയും മറ്റന്നാളും തീരദേശ മേഖലകൾ, കാവേരി ഡെൽറ്റ മേഖല, ചെന്നൈ എന്നിവിടങ്ങളിൽ ശക്‌തമായ മഴയ്‌ക്ക്‌ സാധ്യതയുണ്ട്. കൂടാതെ ആന്ധ്രാപ്രദേശിന്റെ ദക്ഷിണ മേഖലയിലും പുതുച്ചേരി, കാരയ്‌ക്കൽ എന്നീ പ്രദേശങ്ങളിലും രണ്ടു ദിവസത്തേക്ക് മഴ മുന്നറിയിപ്പുണ്ട്.
Read also: മോഫിയയുടെ മരണം; എറണാകുളം ജില്ലാ ക്രൈം ബ്രാഞ്ച് അന്വേഷിക്കും
