ന്യൂഡെല്‍ഹി: ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) രാജ്യത്തെ ടെലികോം സേവനദാതാക്കളുടെ ഒരു വര്‍ഷത്തെ കണക്കുകള്‍ പുറത്തുവിട്ടു. മിക്ക കമ്പനികളും വന്‍ പ്രതിസന്ധിയിലൂടെയാണ് പോകുന്നതെന്നാണ് കണക്കുകള്‍ പറയുന്നത്.
ഒരു വര്‍ഷത്തെ കണക്കുകളില്‍ വോഡഫോണ്‍ ഐഡിയ ഏറ്റവും നഷ്‌ടം നേരിട്ടപ്പോള്‍ റിലയന്‍സ് ജിയോ ഇന്‍ഫോകോം ലിമിറ്റഡും ഭാരത് സഞ്ചാര്‍ നിഗം ലിമിറ്റഡും (ബിഎസ്എന്‍എല്‍) മാത്രമാണ് വരിക്കാരുടെ എണ്ണത്തില്‍ വളര്‍ച്ച രേഖപ്പെടുത്തിയത് എന്നാണ് ട്രായിയുടെ വാര്‍ഷിക പ്രകടന റിപ്പോര്‍ട്ടില്‍ പറയുന്നത്.
വോഡഫോണ്‍ ഐഡിയ ലിമിറ്റഡിന്(വി) പിന്നില്‍ ഏറ്റവും കൂടുതല്‍ വരിക്കാരെ നഷ്‌ടപ്പെട്ടത് ടാറ്റ ടെലി സര്‍വീസസ് ലിമിറ്റഡിനും ഭാരതി എയര്‍ടെല്‍ ലിമിറ്റഡിനുമാണ്. 2018 ഡിസംബറില്‍ വോഡഫോണ്‍ ഐഡിയയുടെ വരിക്കാരുടെ എണ്ണം 41.87 കോടിയായിരുന്നു എങ്കില്‍ കഴിഞ്ഞ വര്‍ഷം 8.61 കോടി വരിക്കാരെ ഇവര്‍ക്ക് നഷ്‌ടമായി. വരിക്കാരുടെ എണ്ണം 2019 ല്‍ 20.6 ശതമാനം കുറഞ്ഞ് 33.3 കോടിയായി. 2020ലും വോഡഫോണ്‍ ഐഡിക്ക് കോടിക്കണക്കിന് വരിക്കാരെ നഷ്‌ടപ്പെട്ടതായാണ് കണക്കുകള്‍.
‘വി’ക്ക് തുടര്‍ച്ചയായ പത്താം മാസവും വയര്‍ലെസ് ഉപയോക്‌താക്കളെ നഷ്‌ടപ്പെടുന്നത് തുടരുകയാണ്. എന്നിരുന്നാലും, ഓഗസ്‌റ്റിലെ നഷ്‌ടം മുന്‍ മാസങ്ങളെ അപേക്ഷിച്ച് കുറഞ്ഞു.
അതേസമയം എയര്‍ടെലിന്റെ വരിക്കാരുടെ എണ്ണം 3.7 ശതമാനം കുറഞ്ഞ് 33.16 കോടിയായി. ആകെയുള്ള വോഡഫോണ്‍ ഐഡിയ വരിക്കാരില്‍ 51.8 ശതമാനവും ഗ്രാമപ്രദേശങ്ങളില്‍ നിന്നുള്ളവരാണെന്ന് ട്രായ് പറയുന്നു. എയര്‍ടെലിന്റേത് ഇത് 43.9 ശതമാനമാണ്.
Read Also: കേരള ബാങ്കിന്റെ ആദ്യ ഭരണസമിതി ചുമതലയേറ്റു; നമ്പര്‍ വണ്‍ ബാങ്കായി മാറുമെന്ന് മുഖ്യമന്ത്രി
