തിരുവനന്തപുരം: മുഖ്യമന്ത്രി പിണറായി വിജയൻ രാജി വക്കണം എന്നാവശ്യപ്പെട്ടുകൊണ്ട് നിയമസഭയുടെ പുറത്ത് പ്രതിഷേധസമരം സംഘടിപ്പിച്ച കെ സുരേന്ദ്രൻ അടക്കമുള്ള ബിജെപി നേതാക്കൾ അറസ്റ്റിൽ. സ്വർണക്കടത്ത് കേസിൽ ഉൾപ്പെടെ രാജ്യവിരുദ്ധ പ്രവർത്തനങ്ങൾക്ക് അവസരമൊരുക്കികൊടുത്ത മുഖ്യമന്ത്രി രാജി വക്കണം എന്നാവശ്യപെട്ടാണ് സമരം. മുഖ്യമന്ത്രി സ്ഥാനമൊഴിയുന്നത് വരെ പ്രതിഷേധം തുടരുമെന്ന് സുരേന്ദ്രൻ വ്യക്തമാക്കി.
തിരുവനന്തപുരം വിമാനത്താവളത്തിന്റെ സ്വകാര്യവത്കരണത്തിനെതിരായ പ്രമേയത്തിൽ ബിജെപിയുടെ ഏക നിയമസഭാംഗമായ ഒ.രാജഗോപാലിനെ സംസാരിക്കാൻ അനുവദിക്കാതിരുന്നത് ജനാധിപത്യവിരുദ്ധമാണെന്ന് സുരേന്ദ്രൻ ആരോപിച്ചു. ഒ. രാജഗോപാൽ തന്നെയാണ് പ്രതിഷേധം ഉദ്ഘാടനം ചെയ്തത്.
ഒരു ദിവസത്തേക്ക് മാത്രം ചേർന്ന സഭയിൽ അവിശ്വാസപ്രമേയ ചർച്ചയുടെ ഭാഗമായി പ്രതിപക്ഷനേതാക്കൾ മുഖ്യമന്ത്രിയുടെ രാജി ആവശ്യപെട്ടിരുന്നു. തിരുവനന്തപുരം വിമാനത്താവളം സ്വകാര്യവത്കരിക്കുന്നതിനെതിരായ പ്രമേയത്തിനിടയിലും പ്രതിപക്ഷ ബഹളം തുടർന്നു. ഇത് ഭരണകക്ഷി നേതാക്കളും പ്രതിപക്ഷാംഗങ്ങളും പരസ്പരം ഏറ്റുമുട്ടുന്നതിനിടയാക്കി.