കോഴിക്കോട്: കാരന്തൂരിൽ ബൈക്ക് അപകടത്തിൽ പരിക്കേറ്റ് ചികിൽസയിൽ ആയിരുന്ന യുവാവ് മരിച്ചു. ഇതോടെ അപകടത്തിൽ മരണം രണ്ടായി. കൂടരഞ്ഞി കൂമ്പാറ ബസാർ എഴുത്താണിക്കുന്ന് വിജയന്റെ മകൻ അർജുൻ (21) ആണ് മരിച്ചത്. കോഴിക്കോട് മെഡിക്കൽ കോളേജ് ആശുപത്രിയിൽ ചികിൽസയിൽ ആയിരുന്നു. കാരന്തൂർ കോണാട്ട് തേറമ്പത്ത് അബ്ദുറഹ്മാന്റെ മകൻ നിഹാൽ (26) സംഭവസ്ഥലത്ത് തന്നെ മരിച്ചിരുന്നു.
കോഴിക്കോട് കാരന്തൂർ ടൗൺ മസ്ജിദിന് സമീപം ഇന്നലെ രാത്രി പത്തരയോടെയാണ് സംഭവം. പെയിന്ററായ നിഹാൽ കുന്ദമംഗലം ഭാഗത്ത് നിന്ന് ജോലി കഴിഞ്ഞു വീട്ടിലേക്ക് മടങ്ങുകയായിരുന്നു. നിഹാലിനൊപ്പം സഞ്ചരിക്കുകയായിരുന്ന ഷാഹിദിനെയും മറ്റൊരു ബൈക്കിൽ സഞ്ചരിക്കുകയായിരുന്ന കൂടരഞ്ഞി കൂമ്പാറബസാറിലെ അർജുൻ വിജയനെയും പരിക്കുകളോടെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
അർജുൻ തീവ്രപരിചരണ വിഭാഗത്തിൽ ചികിൽസയിൽ ഇരിക്കേയാണ് മരിച്ചത്. രാത്രി മഴയത്ത് അമിത വേഗത്തിൽ എത്തിയ ബൈക്കുകൾ തമ്മിൽ കൂട്ടിയിടിക്കുകയായിരുന്നു.
Most Read: കോട്ടയത്ത് 12 പേരുടെ മൃതദേഹങ്ങൾ കണ്ടെത്തി; മഴക്കെടുതിയിൽ മരണം 19 ആയി