തിരുവനന്തപുരം: ഈ വർഷത്തെ മാക്‌ട ലെജൻഡ് ഓണർ പുരസ്‌കാരത്തിന് സംവിധായകനും തിരക്കഥാകൃത്തുമായ കെഎസ് സേതുമാധവൻ അർഹനായി. ആറ് പതിറ്റാണ്ടുകളായി ചലച്ചിത്ര വേദിക്ക് നൽകിവരുന്ന ആദരണീയമായ ബഹുമുഖ സംഭാവനകളെ പരിഗണിച്ചാണ് കെഎസ് സേതുമാധവനെ പുരസ്‌കാരത്തിനായി ജൂറി തിരഞ്ഞെടുത്തത്.
മലയാളത്തിന് പുറമേ സിംഹള, ഹിന്ദി, തമിഴ്, കന്നട, തെലുങ്ക് ഭാഷ ചലച്ചിത്ര വേദികളിൽ സജീവ സമുന്നത സാന്നിധ്യമായിരുന്നു കെഎസ് സേതുമാധവൻ. സംസ്‌ഥാന ദേശീയ അവാർഡുകൾ നിരവധി തവണ ലഭിച്ചിട്ടുണ്ട്. മലയാളചലച്ചിത്ര ശാഖക്ക് സമഗ്ര സംഭാവന നൽകിയ പ്രതിഭകൾക്ക് രണ്ടുവർഷം കൂടുമ്പോൾ മാക്‌ട നൽകി വരുന്ന പുരസ്‌കാരമാണ് ‘ലെജൻഡ് ഓണർ’ പുരസ്‌കാരം.
എംടി വാസുദേവൻ നായരും മധുവുമാണ് മുൻ വർഷങ്ങളിൽ പുരസ്‌കാരത്തിന് അർഹരായത്. തിരക്കഥാകൃത്ത് ജോൺ പോൾ ചെയർമാനും, കലൂർ ഡെന്നീസ് കൺവീനറും, സംവിധായകരായ ഫാസിൽ, സിബി മലയിൽ, കമൽ എന്നിവർ ജൂറി അംഗങ്ങളും ആയിരുന്നു.
Read Also: ലോകകപ്പ് യോഗ്യത; ഫ്രാൻസ്, പോർച്ചുഗൽ ടീമുകൾക്ക് വിജയം
