നിലമ്പൂർ: ജില്ലയിൽ കെഎസ്ആർടിസിയുടെ അൺലിമിറ്റഡ് സർവീസ് ആരംഭിച്ചു. നിലമ്പൂർ ഡിപ്പോയിലാണ് തിങ്കളാഴ്ച മുതൽ സർവീസ് ആരംഭിച്ചത്. 3 ബസുകളാണ് ആകെ 18 സർവീസ് നടത്തുന്നത്. യാത്രക്കാർ ആവശ്യപ്പെടുന്ന സ്റ്റോപ്പുകളിൽ ബസ് നിർത്തിക്കൊടുക്കും.
വഴിക്കടവ് മുതൽ മഞ്ചേരി വരെയാണ് സേവനം ലഭ്യമാവുക. കോഴിക്കോട്, തൃശൂർ, പെരിന്തൽമണ്ണ എന്നിവിടങ്ങളിലേക്ക് ബന്ധിപ്പിക്കുന്ന സർവീസ് ആണ് കെഎസ്ആർടിസി ഒരുക്കിയിരിക്കുന്നത്. വഴിക്കടവ്, മഞ്ചേരി എന്നിവിടങ്ങളിൽ നിന്നും കണക്ഷൻ സർവീസുകളുടെ വിവരങ്ങൾ യാത്രക്കാർക്ക് ലഭ്യമാവും.
കോവിഡ് പ്രതിസന്ധിയിൽ ഉഴലുന്ന യാത്രക്കാർക്ക് സൗകര്യപ്രദമായ രീതിയിൽ യാത്ര ക്രമീകരിക്കാനാണ് പുതിയ നീക്കം. ഓരോ 25 മിനിറ്റിലും ബസ് സർവീസുകൾ ഉണ്ടാവും. കെഎസ്ആർടിസി ഡയറക്ടർ ബോർഡ്‌ അംഗം ആലീസ് മാത്യു സർവീസ് ഫ്ലാഗ് ഓഫ് ചെയ്‌തു.
